La Usc di Ladins

Se à serà su fora Ciavaleis ai 20 de firé la lingia de apuntamenc endrezé da la Cambra de Comerz, Industria, Artejanat, Turism e Agricoltura de Trent ensema al Bim Adesc dal titol ‘Comunità energetiches renovaboles’. Te la quarta scontrèda al zenter congresc Palafiem i reladores é jic a fon sul tem, portan dant soraldut la esperienzes tel Trentin de Comunità energetiches renovaboles (Cer) desche chela de Fiem e del Sarca.

Marco Fumagalli funzionarie del Ofize inovazion e svilup de la Cambra de Comerz de Trent à spiegà che chest percors é stat metù dant per spieghèr e capir miec che che l é la Comunitèdes energetiches renovaboles ma soraldut per slarièr fora la cultura che l é dintornvia chesta comunitèdes, ajache tor pèrt a na Cer vel dir dir prum de dut se tor su n ruol fondamentèl de partezipazion zivica. L à anunzià ence che del 2025 vegnarà metù fora n bando per l efizientament energetich proprio per la aziendes che arà chela de envièr via na Cer.  L conzet de inclujion sozièla che roda dintorn a chesta comunitèdes é stat sotlineà più outes tel cors de la scontrèda. L president del Bim de la valèdes de la Veisc Francesco Dellantonio Tasin à metù l azent sul fat che l’inovazion che pel portèr la Cer é leèda a la partezipazion ativa di sentadins, de la firmes e del publich: sogec che, a na vida desvaliva, cognarà creer tel ruol de la Cer per l svilup del teritorie.

Podede lejer dut su La Usc stampèda de en vender ai 28 de firé.




 (Monica Cigolla)