La Usc di Ladins

Da mile agn incá é Porsenú, cité dl vësco, dagnora stada le zënter dla musiga sacrala. Ciamó al dedaincö vá inant chësta tradiziun liada al cianté de dlijia tres le »Knabenchor« dl Vinzentinum y sambëgn le Cor dl dom, che cumpëda al momënt incër cincanta mëmbri. Deplü é i musizisć ladins che á soné y mené la bachëta tl dom da Porsenú. Bele dl 1500 êl chiló n orghelist ladin, le fascian Daniel Zen (1585-1628), che é spo dl 1627 deventé vësco. Zen ê ince n componist y sües composiziuns é gnüdes conservades tl archif dl Capitul da Porsenú. Agn de gran floridöra á spo le Cor dl dom albü dl Nücënt, sot la direziun dl prou ampezan Angelo Alverá, che é por cört tëmp sté tla cöra da La Pli da Fodom, y é spo rové a Porsenú sciöche insegnant dl Cor dl Vinzentinum. Dirighënt dl Cor dl dom é Alverá sté dal 1935 cina dl 1974, adöm cun l'orghelist marou Alfons Frontull, fre de Jepele Frontull. Dl 1962 él spo rové adalerch n ater orghelist ladin, Otto Rubatscher da Antermëia, »Orgel-Otto« sciöche al ti gnô dit. Rubatscher, che á curí chësta inciaria por bëgn 35 agn, é sté le pröm orghelist laich a soné i orghi tl dom da Porsenú. So suzessur, Franz Comploi, che sona l'orghe dal 1999 incá, é ince n ladin.

Dirighënt y orghelist, intrami ladins
Ai pröms de setëmber é Andrea Tasser de Badia gnü nominé dirighënt nü dl Cor dl dom. Heinrich Walder, sté so insegnant tl conservatore da Balsan, ti á passé le testimone do avëi mené la bachëta por bëgn 31 agn alalungia. 

L'intervista a Andrea Tasser podëise lí en vëndres ai 22 d'otober tla ediziun stampada d'"La Usc".   (kp)