La Usc di Ladins

Cun la Domënia dal Orí á metü man l'Edema Santa y tla cöra da La Ila é la santa mëssa gnüda zelebrada da siur Andrea, n prou african che é gnü adalerch tla Val Badia por daié fora siur Degan da zelebré les funziuns da Pasca. Siur Andrea vëgn dal'Uganda y da jügn dl 2022 incá él a Roma, olache al é gnü mené da süa cöra africana por studié teologia. Chësc ê le pröm iade che le prou african rovâ tla munt y che al odô la nëi. Siur Andrea á orü fá na esperiënza de sorvisc nöia y imparé insciö da conësce la situaziun te d'atres cöres, ince dër piceres, incërch por la Talia. Insciö sará siur Andrea tla Val Badia tratan döta l'Edema Santa. Al dijará mëssa tles cöres da La Ila, Badia y La Val, olache al daidará ince da confessé. I viun n tëmp olache al é na gran ciarestia de proi, olache cöres mëss y messará renunzié a val' santa mëssa, ince la domënia. Al é porchël important y da aprijé che al pois rové adalerch proi da döt le monn, ince te nostes pices realtés; proi jogn sciöche Siur Andrea, che dëida insciö da mantigní via la vita dla comunité, dla cöra y ince nostes tradiziuns.  (kp)