La Usc di Ladins

Ara se trata da ester a öna da daidé por n valgünes edemes paurs ala munt lauré ite le pramí y ince daidé te stala, deache nia püc paurs se stënta da lauré ite da susc so lüch da paur por mancianza de personal. Vigni ann nen vëgnel adalerch cotanc a daidé fora paurs ala munt por n valgünes edemes, jogn y jones da chiló y ince da foradecá, dai Paisc Todësc y dal’Austria. Ara se trata gonot de jënt dla cité che ó fá n pü’ de esperiënza cun n laur da paur y por se destaché por val’ mëis dal laur de ofize o de fabrich monotonn; chësc i fej dër bun. Nia dainré é valgügn de chisc jogn y jones tan apascioná dal laur da paur che ai s’á tut dant da jí plü agn d’isté a daidé fora paurs. Na pert á ciafé na te’ ligrëza cun le laur da paur che ai á instësc tut n lüch da paur adinfit o n’á cinamai cumpré un por podëi fá instësc le paur.