La Usc di Ladins

Nöt cörta por i stödafüch dla bassa Val Badia, che é gnüs trac fora de let da pîpseri y sirenes incër la öna de nöt. Al vardô na majun sön le Lüch de Fornela a Antermëia, na frabica öta y nia plü adorada por fins d’agricoltöra. L’alarm é gnü dé da n vijin, che ê gnü descedé dal gran graciamënt. Atira él insciö pié ia la morona di socursc. Söl post él gnü cherdé i stödafüch da Antermëia, Rina, San Martin de Tor, Lungiarü, Al Plan, La Pli y La Val. Scebëgn che l’intervënt di stödafüch é sté asvelt, ê la frabica bele deplëgn en flames, canche ai é rová söl post. "Le vijin, instës pro i stödafüch, â bele metü man da da destodé cun slauc", nes cunta Simon Clara, vizecomandant di Stödafüch da Antermëia. Ël nes spliga inant che al ê da lauré cun prescia, dantadöt por sconé les frabiches dlungia: "na majun dessura, na ciasa y na pension dlungia". Ara se trata dla Pension Elisabeth. Por fortüna éra jüda da sconé dötes trëi les frabiches. Nia da nen fá indere por le frabicat che á pié füch; chësc é vardü jö daldöt, cun laite ciamó na gru y val’ mascins. Simon Clara cunta co che an á desfiré l’intervënt: "Canche i sun rová söl post unse atira metü man da sconé les frabiches incëria. L’ega unse tut dai idranc, dal Rü d’Alfarëi, dala vasca de Fornela sciöche ince da na secunda vasca sön Col dala Crusc che an dij." Apresciapüch n’ora do l’alarm ê les flames sot a control, mo sambëgn él sté da lauré inant por destodé do. Ti laurs s’á dui stödafüch d’Antermëia ciafé borjades, por fortüna nia dër stersces – de pröm degré. Intrami é gnüs condüc te ospedal dala Crusc Blancia d’Al Plan, por lascé ciaré do. Danter chisc ince le vizecomandant instës, che ê spo defata bele indô söl post. Inscioma: daidé cina ala fin. N punt de domanda él sambëgn por les rajuns dl medefüch, n’êl pö tl frabicat no fëgn no tiers. Le compit da inrescí les gaujes é tles mans di Carabiniers y ince di Stödafüch Profescionai da Balsan – che röia söl post te chisc momënc (scrit dales 8:22). Dedô podarán spo mëte man da trá jö la frabica y romené demez ci che é resté.  (pablo)