La Usc di Ladins

Fá movimënt é valch de natural por la porsona, en particolar por i mituns y les mitans. Sëgn che les vacanzes é jüdes a piz y che n ann de scora nü á metü man, vëgnel indô le momënt da se senté jö pro banch. Mo sté chic ne é nia dagnora saurí, cis nia por i plü pici; por chi de pröma che vëgn dala scolina, olache ai podô lové sö, soghé y salté döt le de. L'ora de ginastica ne basta nia y domisdé él tröc mituns y mitans che fej ativités sportives desvalies. Mo ince tratan l'orar de scora vára debojëgn da se möie. Stüdi á desmostré che fá movimënt – ince tratan les leziuns – pormët da mioré l'imparé y é n arichimënt por le bëgnester nia ma fisich, mo ince sozial y emotif di scolars y dles scolares. L'intendënta dles scores ladines, Edith Ploner, á sburlé do dassënn por che al gniss porté ite deplü ativités de movimënt tles scores elementares ladines y insciö él pié ia le proiet dla »Scora Movimentada«, o »Bewegte Schule«, sciöche al ti vëgn dit ti Paisc Todësc, olache ara é bele scialdi plü slariada fora. Le proiet é pié ia l'ann passé te döes scores elementares ladines: chëra d'Al Plan y chëra da Santa Cristina y al vëgn coordiné da Lorenz Clara – referënt por le sport scolastich - y Emanuel Gravino – referënt por l'educaziun ala sanité y ala mobilité. Iniann vá le proiet inant te chëstes döes scores, cun le fin da porté ite chësta iniziativa ti proscims agn ince te atres elementares dles valades ladines. 

Deplü podëise lí tla ediziun stampada d'La Usc, da indoman, vëndres ai 9 de setëmber.   (kp)