La Usc di Ladins

Ti agn Setanta êl gnü sö te Südtirol n prigo nü y nia aspeté. Al se slariâ fora la dependënza dales droghes y al ê tres plü jogn che tomâ ite tla tënora. Le prou don Giancarlo Bertagnolli s’â perié decá dal Vësco Gargitter la inciaria da podëi se dediché deplëgn ai drogá. Al â porchël metü sö l’assoziaziun "La strada – Der Weg", olache ël y so team â pié a man le problem cun gran coraje.
Por imparé a conësce metodes efiziëntes de tratamënt, ê don Giancarlo rodé por döta la Talia. A Firenze â l’arzivësco metü a desposiziun na ciasa y â metü sö n team, che daidâ da gní fora dla droga porsones bele n pü’ plü vedles, che â bele familia y n laur. I drogá â bele despassé deplü cures por se destó, che n’â baldi jové nia, deache ares n’ê nia bunes da desmëte la raisc dla dependënza. Lapró ê düc dependënc dal’eroina, ci che complicâ ciamó deplü le tru da nen gní fora. Deache i drogá n’â por fortüna nia ciamó pordü so laur y ai ne podô gnanca le fá sté sö, â le team de esperc svilupé na sort de terapia nöia.
Por imparé a conësce chësta metoda alternativa, ê don Giancarlo jü a Firenze cun n grup de proi. Iö ê lapró. Lajö s’unse incunté cun 8 porsones varides y n valgügn terapeuc, che nes â splighé süa metoda.
Le pröm vare ê che n pice grup de 4 cina 5 drogá s’incuntâ trëi sëres al’edema, trëi ores alalungia, por se cunté l’un cun l’ater sciöche ai â consumé concretamënter la droga ti dui dis denant. Chësc pé dër saurí, sce al ne foss nia n rampin: i drogá mënt sciöche rozes. Ai se mënt dant a se instësc y ince ai atri. Aladô di acompagnadus de grup, messân porchël imprömadedöt desmëte chësta tendënza da mintí, por podëi gní lëdi dala dependënza. I partezipanc messâ insciö vigni edema se cunté nü ores alalungia de so consum de eroina, cina che ai ê finalmënter bogn da lascé ester les baujies y dí fora döta la verité, zënza tëma y zënza pisimé. Chësc n’é nia tan scëmpl y al s’adora so tëmp – sciöche al nes é gnü cunté; val’ iade cina cater mëisc.
Canche le grup de terapia â imparé da sté sön la verité, metô man la secunda fasa: tratan les incuntades â i drogá da se dé jö deboriada cun na cossa che ti dê ligrëza y ti scincâ n sentimënt de contentëza.
I grups podô instësc se chirí fora la tematica: n grup se dê jö cun la geografia dla Turchia, n ater cun la "Divina Commedia" de Dante, ciamó n ater cun la opera "Aida" de Giuseppe Verdi. Le travert n’ê nia tan chël da imparé val’ de nü, por passé n ejam de val’ sort o arjunje na cualificaziun. Imprömadedöt nen jôra da descurí la belëza ascognüda dles cosses y se ralegré impara. Y belavisa: le cunt stimenâ. I argomënc afascinâ tres deplü, ci che ti scincâ na te ligrëza, che ai n’adorâ nia plü la faziun euforica dla eroina.
I n’ê nia bun da crëie, porchël âi damané do sce i n’â mine capí damat. Mo an me confermâ che al ê propi la belëza – chirida y ciafada – che delibrâ les porsones, vare do vare, dala destruziun dla dependënza. I ê zënza parores. Dlungia me êl don Giancarlo. I ti â ciaré cun morvëia y â dit: "Ponsa a nostes scores!" I ciamps che ascognô chësta belëza ê pö döt materies de scora: geografia, leteratöra, ert, musiga, storia, ez. Te dötes chëstes materies podôn descurí belëza, sce an se dê jö impara.
Ciodí é pa spo studëntes y studënc feter dagnora contënc, canche la ora de scora toma fora, y iubilëia cinamai sce al toma fora n de intier de scora? N’ê pa i drogá nia feter düc ince studënc? Ci él pa che fej fora la desfarënzia, che i medemi argomënc ti fej a valgügn la vita plü ria, y nen dëida indere d’atri da gní fora da na dependënza tan sterscia. La resposta é scëmpla: a na pert ti an vára ma dl vantaje y profit deforaia, dles bunes notes y dles cualificaziuns; d’atri röia indere ite tla dërta belëza y verité. Chi che chir ma le vantaje deforaía, resta öc y püri daite; chi che röia ite tla belëza y tla verité, y á la ocajiun da la ciarcé, vëgn plü ric y contënc. Avisa chësc é ci che i drogá esperimentëia. Cun chël che ai se dá jö nü ores al’edema deboriada cun süa tematica y röia ite tres plü sot, ési bugn da descurí tan che ara i afascinëia y tan de bel y de vëi che ara contëgn. Sambëgn ól ester n tru lunch y impegnatif, cina che an sint tan n gran plajëi y tan na gran ligrëza, che ti tol le funz ala dependënza.
Chësta vijita a Firenze m’á dé tröp da ponsé. Da dailó inant ái dagnora porvé tratan les leziuns da lascé slominé la belëza y la verité dles cosses, plü co le vantaje y le profit. Te nosta sozieté dla prestaziun n’él nia tan saurí, mo al é dassënn important y nezesciar.