La Usc di Ladins

"Laurun deboriada", por tigní sö nosc bel lingaz ladin: chësc é l’invit che le Ciamp pedagogich, sot ala direziun de Maria Kostner, i á mené fora al personal insegnant y ales mitans y ai mituns dles scores primares ladines, meton a desposiziun na sfilza de materiai didatics nüs, che é gnüs presentá chisc dis a Sëlva y a San Martin de Tor.
Ara se trata de bëgn 16 unités didatiches che se desfarenziëia danter trëi liví de dificolté. Dötes adöm é liades sot al titul "Laurun deboriada" y trata argomënc desvalis fora dla vita da vignidé. Ince sce le material é por ladin, vëgn le personal insegnant impó racomané da adoré chëstes propostes de laur te dötes les materies, nia ma tratan l’ora de ladin, se tratera pö de tematiches dër desvalies, che stlüj danter ater ince ite la educaziun zivica. Al dess insciö gní renforzé y valorisé nosc lingaz ladin; chësc á ince alzé fora l’ispetur Albert Videsott. Le material é gnü metü adöm y lauré fora da Veronica Rubatscher, colaboradëssa dl Ciamp pedagogich, che á ince albü tles mans la coordinaziun dl laur.

Deplü sön le material didatich nü podëise lí y odëi t’La Usc di Ladins di 4 de otober