La Usc di Ladins

12. Cianté sön Munt da Rina
Chësta domënia ai 20 d’agost él da aldí sön Munt da Rina bëgn 12 cors y la »Böhmische« da Rina
La 12. ediziun dl »Cianté sön Munt da Rina« mët man dales 11:00 cun la santa mëssa abelida dai cors presënc. Dales 12:30 él spo la »Böhmische« da Rina che tëgn conzert, tratan che al é sambëgn la poscibilité da marné o se bëre valch. Dales 2 inant él spo da aldí i cors partezipanc, cun dui toc porom: le cor di mituns y jogn da Rasun, le terzet »A per sorëdl«, le cor di ëi da Vals­perch, le cor »Antervoisis«, la »Singgemein­schaft Ham­mers­bach – Grainau«, le cor »Philia«, le Cor de dlijia d’Al Plan, le terzet »Excitas«, i »Mosaic Singers & Players«, le cor di ëi da Türesc, le Cor de dlijia da Rina y le Cor Col dla Vedla  – organisadú dla manifestaziun. Al vëgn ince pité n sorvisc de trasport da ciamp dal sport da Rina demez.

»Magnificat« a Moena,

• 
•  

View the embedded image gallery online at:
https://www.lausc.it/manifestazions-y-evenc/24597-manifestazions-atuales#sigProIdf61cba1529

Laion e Selva
Trei conzerc adum per i 30 egn del Ensemble Canticum Novum: l prum en vender ai 25 de aost te gejia de Sèn Vile a Moena
La corala Ensemble Canticum Novum de Moena, vidèda dal maester Ilario Defrancesco, festejea sie 30° cedean con na lingia de conzerc.
Da la fradaa e la bona colaborazion anter i diretores Ilario Defrancesco e Claudio Kersch­baumer l é nasciù n program de musega sacrala dal titol »Magnificat«, che porta adum sun paladina l’Ensemble Canticum Novum de Moena e i Cores de gejia de Laion e Ron­cadic, compagné da na orchestra che tol ite sonadores beleche duc da Gherdena.
80 ciantores, 5 solisć e passa 20 sonadores met dant n rich program da la Missa Solemnis en DO maggiore KV337 de W.A. Mozart e Magnificat RV610 de Antonio Vivaldi con apede ence vèlch toch di autores contemporans Ola Gjeilo e di medemi maestres Defrancesco e Kerschbaumer.
L program met dant 3 conzerc, duc con entrèda debant:

• en vender ai 25 de aost da les 21:00 te la gejia de Moena
• en sabeda ai 26 de aost da les 20:00 te la jejia de Laion
• en domenia ai 3 de setember da les 18:00 te la gejia de Selva

Jöbia de Corvara - Aperitif cun l’ert ladina
Ince le secundo apuntamënt de chësc isté cun la »Jöbia de Corvara« sará dediché al’ert ladina, cun de plü artisć locai che presentëia sües operes, sona o cianta
Le secundo apuntamënt vëgn a s’al dé la jöbia ai 24 de agost. Ara se trata de n domisdé rich d’ert, olache an pó se gode n bun aperitif ti locai dl zënter de Corvara, che vëgn stlüt al trafich dales 17:00 ales 22:30. An podará ascuté sö les melodies di orghi da man de Ermes Costa adöm a sü studënc, sciöche ince l’orchestra de percusciuns »Sissamba« sot ala direziun de Max Castlunger. Guido Tavella mostrará l’ert dl depënje y Matthias Peccei lasciará odëi co che an fej da ziplé tl lëgn. I plü pici pó se devertí pro le stont di jüc y ince se lascé depënje sö le müs, cina ales 19:00. La manifestaziun vëgn tignida dales 17:00 ales 20:00; sce al foss bur’ tëmp, vëgnera sburlada al 31 de agost.

»Momënc ladins« a La Val
Ai 20 de agost vëgnel pité n de por descurí nosta cultura y i laurs da paur da inlaota y d’aldedaincö
La manifestaziun »Momënc ladins« vëgn tignida ai 20 de agost a La Val – un di paisc olache an pó vire gran pert de nosta cultura ladina da paur. La manifestaziun mët man dales 9:00 pro le ciamp dal sport a La Val y se destënn fora por döt le paisc, olache an incuntará jënt dl post che zipla le lignan, siëia i prá, cöj pan, arjigna ca ciajó; implü arán ince la poscibilité da vijité les stales di tiers. Por l’ocajiun gnarál ince organisé na ciacia al tesur por families fora por les viles, olache an podará imparé cosses nöies sön la cultura, la tradiziun y les coriosités dl paisc. Pro de plü stonc podarán ciarcé spezialités ladines, pitades en colaboraziun cun la jönëza da paur, la musiga dl paisc, les patrones y l’uniun di paurs da La Val. Al ne manciará nia intrati­gnimënt musical y n program de devertimënt por mituns. Por tó pert n’ól ester degüna prenotaziun.

»Doubt and faith« - dübe y fede
Le festival Badiamusica vá inant en mercui ai 21 d’agost dales 21:15 te dlijia da La Ila, cun l’ensemble »La douceur et l’esprit«
Protagonisć dl conzert a La Ila é Andrea Oberparleiter (usc), Veronika Egger (vidora y viola da gamba), Nadia Prousch (fabló) y Marianna Bisacchi (cembalo). »Dübe y fede« é le titul dl conzert, che á da fá cun Tomesc, le desfidënt - la figöra de apostul te chëra che tröc pó se identifiché: al é plü scëmpl da crëie sce an á na proa. Sciöche Tomesc che mëss pié ite cun la man les ferides de Gejú por crëie ala ressoreziun. Tröpes dlijies tl monn é dedicades a S. Tomesc, danter chëstes ince öna dles döes dlijies prinzipales a Leipzig. Te chësta dlijia é la inciaria de cantor liada tradizionalmënter ala direziun dl »Thomaner­chor«, che é dër conesciü y á n gran prestisc. J. S. Bach á surantut chësc rode por 27 agn. Operes de deplü cantors dla »Thomaskirche« de Leipzig y de mëmbri dl cor costituësc la strotöra musicala dl conzert a La Ila, olache al vëgn integré les sis meditaziuns sön la figöra dl apostul Tomesc de Andrea Oberparleiter.

Sabina Willeit & Lignum Quintett
Chisc é i protagonisć dl conzert de Badiamusica dal titul »Un voyage dans l’opéra«, en sabeda ai 26 d’agost dales 20:30, te salf dles manifestaziuns a San Ciascian
Sön le iade tres la opera nes condüj a San Ciascian Sabina Willeit (mezzosopran), Monika Federspieler (fabló traversal), Sonja Busellato (oboa), Werner Mayr (clarinet), Egon Lard­schneider (corn) y Igor Delaiti (fagot).
L’ensemble portará dant operes de Wolfgang Amadeus Mozart, Gioacchino Rossini, Georges Bizet, Giuseppe Verdi, Amilcare Ponchielli, Giacomo Puccini, Alfredo Catalani.

Long River Rock Revolution
En sabeda ai 19 de agost dales 20:00 inant vëgnel tigní le »Long River Rock Revolution«, a Lungiarü, tl salf dles manifestaziuns Giovanni Costa
Al sará na sëra dedicada ala musiga rock, cun melodies particolares de de plü bands. Te chësta ocajiun sonará damper­fora i »Evergreen« – na band punk rock dl Südtirol. Inant vá le conzert cun la band da Lungiarü »Überspannung«, che nes lasciará aldí le pröm iade sües cianties.
La serada vëgn stlüta jö cun la band »Loud« – che é conesciüda sciöche »tribute band« di AC/DC, cun na pasciun sota por le hard rock; ai nes porta insciö sön paladina les cianties de chësta band tan conesciüda, che alda pro i pioniers dl stil rock.
Düc y dötes é dër bel inviá/inviades a chësc evënt particolar, por fá garaté na bela sëra, acompagnada da musiga rock y l’ocajiun da sté en compagnia.

»Muss« en mostra
Tl Istitut Ladin a San Martin vëgnel daurí en vëndres ai 25 d’agost na mostra de Guido Anton Muss
Le Museum Ladin inviëia, adöm al Istitut Ladin Micurá de Rü, ala daurida dla mostra »operes – Werke – opere« dl artist Guido Anton Muss. L’apuntamënt é por en vëndres ai 25 d’agost dales 18:00, tl salf dl Istitut Ladin a San Martin de Tor. Guido Anton Muss, figöra zentrala sön la scena artistica sudtiroleja dla secunda pert dl XX secul, é n artist che é sté bun da mëte adöm les animes desvalies – linguistiches, culturales y artistiches – dl raiun provinzial. Tla mostra, che sará daverta cina ai 24 de setëmber, él da odëi na seleziun de operes fora de coleziuns dla Provinzia che rapresentëia te na variaziun zënza fin tematiches che ti stô a cör, dala figöra feminina ala mitologia al rëgn di tiers.