La Usc di Ladins

Musical »N de a La Spona«
En vëndres ai 5 de messé, dales 19:30 tl salf manifestaziuns a La Val
Da ci ora sona pa le sonarin da doman ite da La Spona? Él mo zacai che s’la indormedësc ia? Che fej pa le gosté? Y ti vál ince val’ iade le lat te füch?
N de a La Spona é n de particolar, cun regoles, laur y orars che mëss ester, mo ince cun riüdes, ciacolades y jüc adöm. Chësc oress i assistis y les assistides de La Spona ti presenté al monn intier, implí cun cianties. Marion Palfrader s’á tut le tëmp y á lauré fora adöm a d’ëi chësta manifestaziun y düc ne á nia sparagné sforc, tëmp y usc por arijigné val’ dër de plajor, che vëgn mostré en vëndres ai 5 de messé dales 19:30 a La Val. I esson dër ion sce Ves tolesses le tëmp da gní a se ciaré pro!

La Val inviëia ala segra
Tla fin dl’edema di 6 y 7 de messé él a La Val la segra dl paisc, cun musiga y aurela cörta
La Jonëza da Paur y i Stüda­füch da La Val inviëia ala Segra. La festa mët man bele la sabeda ai 6 de messé dales 15:30, cun l’alzada dl »Kirsch­tamichl«. Dales 18:30 vára inant cun musiga y poscibilité da cené, dales 20:30 sona i »Zwoa a holb Lederhosn«. La domënia dales 8:30 sarál spo la mëssa da festa te dlijia, y dedô dales 10:00 n conzert dla musiga da Pfronten. Dales 13:00 él la Musiga da La Val che tëgn conzert y dales 17:00 inant sonará spo i »Tiroler Stolz«. Por spëisa y boanda vëgnel sambëgn fistidié.

»Instagram por l’ert«
Curs da fá jö y plazé i contignüs al miú söla plataforma Instagram
L’EPL–Ert por i Ladins mët da jí le curs de ma­najamënt dl contignü sön Instagram en sabeda ai 29 de jügn 2024 dales 9:00 akes 14:00 pro la Scora a La Pli de Mareo. La refe­rënta é l’artista Gaia Lio­nello che inse­gnará la ana­lisa, l’este­tica, le mood­board y i programs che pó gní adorá por cherié n bun post y na »storia« atrativa sön Instagram. Le prisc por tó pert é de 70,00 Euro, 50,00 Euro por i scric y les iscrites al’EPL.
Infos y prenotaziuns pro Gaia al numer +39 333 3653636.

Sëira dl vin a Santa Cristina
Tl raion da jì a pe Bënunì a S. Cristina vëniel inò a sl’ dé la sëira dl vin, n vënderdi ai 5 de lugio dala 19:30 inant
Na bela cumpëida de ciuleies dal vin de gran inuem de Südtirol pi­terà da ciarcë na vela de vins de gran cualità, sun l tepih cueciun tl raion da ji a pe a S. Cri­stina. Leprò saràl nce mesun se maië vel’ bon bucon servì pra de plu stonc sun ëur de streda. Sambën unirà dut cumpanià da de bela mujiga su­neda y cianteda dala grupes Take Off y Handmade.

Segra de Urtijëi
La grupa di Destudafuech de Urtijëi nvieia a doi dis de festa sun Plaza de S. Antone, ai 6 y ai 7 de lugio
La segra, ntan chëla che n puderà for giapé velch de bon da maië y da bever, scumëncia n sada ai 6 de lugio dala 12:00.
Sambën saràl nce de bela mujiga: dala 15:00 sunerà i Odlesound y dala 21:00 inant The Jam’son.
N dumenia ai 7 de lugio do la gran Santa Mëssa, saràl la defileda y cunzert dla Mujiga de Urtijëi (dala 12:00). Domesdi mujiga di Südtiroler Hoderlumpm y dala 19:00 inant dla Völser Böhmische. Duc y dutes ie nviei de cuer.

La Bira Te Fascia
L Festival de la Bira artejanèla da mont ve speta a Ciampedel dai 19 ai 21 de messèl con degustazions, musega live, laboratories per bec e l concors per la mior bira
L Festival dedicà a la Bira artejanèla da mont festeja si prumes 10 egn. Dai 19 ai 21 de messèl jun Ischia de Ciampedel, te tendon de la manifestazions, se podarà jir tel vif de chest apuntament doventà oramai stabol anter i evenc del istà fascian. Da 10 egn l Festival se dèsc ju per la valorisazion di picoi produtores de bira da mont che auza fora no demò sie prodot ma ence cultura, tradizions e identità. Chest an l é stat envià 6 produtores dal Trentin, Venet, Piemont e Toscana.
La neva de chest an l é l concors ‘Na Bira te Fascia’ che envia duc chi che tol pèrt a litèr sia bira perferida. L’edizion de chest diejem an vegnarà zelebrèda da na bira spezièla fata aposta en colaborazion coi produtores de bira de Rampeèr de Ciampedel.
En vender ai 19 de messèl l tendon aur da les 16:00 fin mesanet, h. 21:00 musega live con i Fade.
En sabeda ai 20: h. 17:00 Malt Attack, h. 17:30 Masterclass e h. 21:00 musega con i Satomi Hot Night.
En domenia ai 21: h. 15:00 e h. 17:00 Malt Attack e Masterclass, h. 18:30 premiazion ‘Na Bira per l’Istà’, h. 21:00 musega live con la Spritz Band.
L Festival La Bira Te Fascia é pissà e endrezà da la Sociazion Comunicarea col sostegn de Provinzia Autonoma de Trent, APT de Fascia, Strada dei Fromaggi delle Dolomiti, Comitat Manifestazions Ciam­pedel e da la Sociazion de categoria Unionbirrai.
Informazions: www.labiratefascia.it ence whatsapp al 329 9159877.
Prenotazion Masterclass e Laboratories: labiratefascia@gmail.com

Panorama Music te Fascia
Na lingia de conzerc de aut livel debant a l’averta sa mont, ti locai de nesc paijes e te la senta de la Grenz a Moena
La sociazion La Grenz de Enrico Tommasini, en colaborazion con i impianc portamont e l sostegn de l’Apt de Fascia, de la Region Trentin Sudtirol, de la Provinzia de Trent e del Comun General de Fascia à endrezà ence chest an n rich calandèr per l »Val di Fassa Panorama Music«, l festival de musega che sporc conzerc sa mont, te la senta de la sociazion a Moena e ti locai de nesc paijes.
Ence te chesta neva edizion l responsabol artistich Tommasini, col program JMMJ l à vardà de ge dèr lèrga ai gropes e ai artisć de noscia valèdes o de autra mendranzes linguistiches. Da uzèr fora i apuntamenc con la poeta ladina Roberta Dapunt e l grop de musega fascian ‘Popconer’. L Festival taca ite belapontin con n grop de musega de mendranza catalana che rua da Barcelona.
En domenia ai 30 de jugn da les 21:30 a La Grenz ‘Barcelona World’s Music Ensemble’ con Mirena Nafarrate ousc e rezitazion, Nadia Orta Freixes, Jana Gallifa, Davide Fontani e Roger Castells.
En domenia ai 7 de messèl da les 11:30 al Refuge Freidrich August sun Col Rodela Charlie Cinelli Band.
En domenia ai 14 de messèl da les 11:30 sun Ciampedie ‘Revensch’: Helga Planken­steiner, Paolo Trettel, Glauco Benedetti, Michael Engl, Michael Lösch e Marco Soldà.
En domenia ai 21 de messèl da les 11:30 al Agritur El Mas de Moena i ‘Twelve Gates’ con sia musega finger picking.
En jebia al prum de aost da les 11:00 al Refuge Fuciade i ‘Baraccone Express’.
En domenia ai 4 de aost da les 17:00 al For You Bistrot al XAlp de Pera Marco Delladio & Matteo Rossetto.
En mercol ai 7 de aost da les 17:30 te sala Rovisi te piaz de Sotegrava a Moena en­conter con la poeta ladina Roberta Dapunt che lejarà vèlch poesia compagnèda da Marcello Fera al violin.
En sabeda ai 10 de aost da les 21:30 a La Grenz de Moena ‘Carla Marcotulli Jazz Quintett’.
En domenia ai 18 de aost da les 21:30 a La Grenz a Moena l grop fascian ‘Popcorner’ con Nicolò Dorich, Tommaso Dondio, Gianpaolo Chiocchetti, Daniele Chiocchetti, Sabrina Calligari, Mery e Melany Locatin.
En sabeda ai 24 de aost da les 21:30 semper a La Grenz ‘Jam Session’.
Ultim apuntament con la musega de mendranza en domenia ai 25 de aost da les 11:30 sun Ciampedie con Alba Armengou, talent de tromba e ousc cresciuda te la Sant Andreu Jazz Band de Barcelona.

Autodefenüda personala
La Uniun Sport La Ila mët a jí n curs por jogn y adulc
De messé y agost él la US La Ila che organisëia n curs de autodefenüda personala, cun le maester Luigi Bellotto. Le curs vëgn tigní tla palestra dla scora mesana da La Ila; al mët man ai 8 de messé y vá inant por indöt 8 iadi (8 y 9, 22 y 23 de messé; 5 y 6, 19 y 20 de agost).
Le grup de jogn y jonins da 12 a 17 agn s’incunta dales 18:30 ales 19:30, le grup di gragn da 18 agn insö dales 19:30 ales 20:30. Le cost é de 90,00€. Iscriziuns ma online sön www.uslaila.it sot la usc »Fitness-corsi«; infor­maziuns plü menüdes ciafon ala mail fitness@uslaila.it