La Usc di Ladins

La Bira Te Fascia
L Festival de la Bira artejanèla da mont sarà jun Ischia a Ciampedel dai 19 ai 21 de messèl
Da 10 egn l Festival de la Bira artejanèla da mont se dèsc ju per valorisèr i picoi produtores che auza fora ence cultura, tradizion e identità. Dai 19 ai 21 de messèl ve speton a Ciampedel te tendon jun Ischia con degustazions, labora­tories per picoi e gregn, musega live e legraza.
Sarà 6 produtores da Trentin, Venet, Pie­mont e Toscana, l concors de la bira preferida e se podarà cercèr la bira spezièla del cedean fata en colaborazion con Rampeèr de Ciam­pedel.
- En vender ai 19 l tendon aur da les 16:00 a les 24:00; da les 21:00 musega live coi Fade.
- En sabeda ai 20 l tendon aur da les 16:00 a les 24:00. Da les 17:00 Malt Attack e do Masterclass; da les 21:00 i Satomi Hot Night.
- En domenia ai 21 l tendon aur da les 12:00 a les 24:00. Da les 15:00 e 17:00 Malt Attack e Masterclass, da les 18:30 pre­­miazion ‘Na Bira per l’Istà’ e da sera la Spritz Band.
La Bira Te Fascia é endrezà da la Sociazion Comunicarea col sostegn de Provinzia de Trent, APT de Fascia, Strada dei Formaggi, Comitat Manifestazions de Ciampedel e Sociazion Unionbirrai. Info www.labirate fascia.it; wa 329 9159877; prenotazions: labiratefascia@gmail.com


Le »Gadersound« é indo chiló
Ai 19 y 20 de messé ves aspeta le Gadersound Open Air Festival 2024 a Pidrô cun n program che spaca y novités da morvëia
Le team de 100+ volontars inviëia dötes y düc a tó pert ala ediziun numer 19. Le festival mët man le vëndres dales 6 da sëra adöm a Julian Moling & Wisetime; la sëra vá spo inant cun 3 d’atri grups che metará a balé na fola de jënt sciöche arbëies che tira salc: Jakala, Raphael y Rebel Rootz. L’entrada é debann por düc sura i 50 agn.
Le de do se descëdon fora cun na leziun de yoga dales 10:30. Sura misdé vëgnera spo interessanta por families: sciöche l’ann passé, sarál indô la poscibilité da se lascé depënje sö la müsa, pastelné val’ de bel y sambëgn marné val’ de bun.
L’entrada al festival da misdé é de­bann. Do marëna sona »L vin y l din« – na band de jogn dla valada, dales 15:00 gnarál n ghest a sorpresa a fá rí gragn y pici, y dedô podëise ascuté les beles melodies di »Gota«, le grup de Katia y Jan Moling. Sön la sëra vëgn spo la tenjiun tres plü alta cun les bands: Love in Lions, Tumulti, La Tresca y Riserva Moac.


Mostra »Raisc« de Markus Moling
La vernissaja é en vëndres ai 19 de messé dales 18:00, tl gran salf dl Istitut Ladin Micurá de Rü a San Martin
En vëndres ai 19 de messé dales 18:00 vëgnel daurí tl Istitut Ladin a San Martin la secunda mostra da d’isté. Al é la mostra de Markus Moling da La Val, dal titul »Raisc«. L’artist mët fora na seria par­ticolara de retrac. Les porsones rapre­sentades é por le plü antenac defunc dl artist; porsones de chëres che al se recorda apëna, á pö tröpes de ëres vit bele dan da n secul o cinamai denant. Al é porchël porsones che condüj l’artist a na reflesciun sön sües raisc y sön le passé. L’introduziun ala mostra gnará tignida da Nadia Moling y la vernissaja gnará stlüta jö cun n pice renfrësch. La mostra sará spo daverta dai 20 de messé cina ai 4 d’agost, vigni de dales 10:00 ales 12:00 y dales 15:00 ales 19:00.


Curs da jadiné
L’Ice Club Alta Badia organisëia cursc da jadiné por mitans y mituns da 4 agn insö, tl stade dala dlacia a Corvara
Dai 17 de messé ai 29 de agost orga­nisunse i cursc da jadiné por mituns y mitans dai 4 agn insö. I cursc é daverc por prinzipianc y por progredis. Por les mitans y i mituns che vá a scora sará le curs i mercui ai 17 y ai 24 de messé y dedô vigni lönesc y mercui, dales 16:00 ales 16:45.
Por les mitans y i mituns dla scolina sará le curs la jöbia ai 18.07., le mercui ai 24.07. y dedô vigni mertesc y jöbia dales 16:00 ales 16:45.
Le curs costa 90,00€. Düc i mituns y dötes les mitans che á vëia da jadiné dess s’anunzié. Por informaziuns y prenotaziuns prëibel cherdé sö o scrí anter i 16 de messé al numer 333 2930586.


Na munt de emoziuns
Alpinisć de livel internazional cuntará tl’Alta Badia de sües esperiënzes tles munts: trëi apuntamënc tratan l’isté, le pröm ai 15 de messé
La seria de referac cun i alpinisć dal titul »Na munt de emoziuns« vëgn organisada ince en chësc isté tl’Alta Badia. Le pröm apuntamënt vëgn tigní en lönesc ai 15 de messé a Corvara, cun l’alpinista Angelika Rainer. Te so referat »Sogni verticali« cuntera de sü traverc, sciöche chël de pröma ëra che á arjunt na via de livel D15, spo por avëi fat la via alpinistica Italia 61 y le pröm 9a sön pera tla Spagna. Marco Confortola é spo le protagonist dl’incuntada di 27 d’agost a La Ila. Te so liber »Oltre la mon­tagna« baiel di cambiamënc dla munt, dl ambiënt y ince di cambiamënc personai y sciöche i afronté. La seria de referac se stlüj jö ai 4 de setëmber a La Ila cun l’alpinista austriaca Gerlinde Kaltenbrunner. Ara nes cuntará de sües aventöres por arjunje les 14 pizes prinzipales di 8.000 zënza l’aiüt de ossigen y zënza l’aiüt di portadus. Les incun­tades vëgn tignides tl salf dles manifestaziuns; les prömes döes é dales 21:15 y por talian, l’ultima é dales 20:30 y por todësch.


Nos dales bales
Fora por le zënter da San Linert pón ciarcé de vigni sort de bales, sarades y duces, en mertesc ai 16 de messé
Sciöche le titul dla manifestaziun dij bele, é les bales les protagonistes dla manifestaziun, che vëgn tignida a San Linert de Badia, en mertesc ai 16 de messé dales 19:00 inant. Nü coghi y conditurs de deplü hotí y restoranc de Badia interpretëia do süa fantasia y so stil chësta spezialité locala.
Les variaziuns de bales duces y sarades gnará sorvides adöm a n bun gote de vin de Südtirol, fora por la strada prinzipala da San Linert, che vëgn por l’ocajiun stlüta al trafich, dales 18:00 ales 23:00. Le grup »Jam’son« se crüzia dl intratignimënt musical.
Por tó pert ala serada n’ól ester degüna pre­notaziun y an pó cumpré i bons por les bales bele danfora, ti ofizi turistics dl’Alta Badia, online sot a www.altabadia.org o diretamënter en chë sëra tl zënter da San Linert. Sce al foss bur’ tëmp, vëgn la mani­festaziun spostada ai 17 de messé.


Incuntades leterares cun auturs taliagn
L’Alta Badia ospitëia ince chësc isté na dërta linia de »Incuntades cun l’autur«, dai 19 de messé cina ai 16 d’agost
Ince en chësc isté sará la sajun tl’Alta Badia sará rica de apuntamënc cun auturs dal monn dl jornalism y dla cultura.
Dai 19 de messé cina ai 16 d’agost vëgnel organisé fora por i paisc dl’Alta Badia deplü incuntades cun personaji dla leteratöra taliana. N valgönes de chëstes presentaziuns gnará ince tignides alaleria, amesa la natöra. Tratan les manifesta­ziuns gnarál traté temesc d’atua­lité y n valgügn apuntamënc gnará abelis da musiga.
I apuntamënc cun i auturs

Chisc scriturs gnará a se ciafé tl’Alta Badia:
19.07. dales 17:30 a Corvara: »Non farti fottere« de Lilli Gruber
24.07. dales 17:30 a Corvara: »Resisti, cuore« de Alessandro d’Avenia
27.07. dales 17:30 a Corvara: »Vivere la montagna« de Paolo Crepaz
30.07. dales 17:30 a Corvara: »Lo statuto delle lavoratrici« de Irene Soave
01.08. dales 17:30 a Corvara: »Discorso per un amico« de Erri de Luca
03.08. dales 17:30 a Corvara: »A te vicino così dolce« de Serena Bortone
04.08. dales 17:30 a Corvara: »Pioggia« de Maurizio De Giovanni
05.08. dales 10:30 pro la Ütia Lé a Badia: »Anni d’oro« de Arno Camenisch, en colaboraziun cun Pro Helvetia
07.08. dales 17:30 a Corvara: »Tutta la vita che resta« de Roberta Recchia
10.08. dales 17:30 a Corvara: »Il tempo del corpo« de Antonella Viola
13.08. dales 17:30 a Corvara: »Dentro il Palazzo« de Carlo Cottarelli
14.08. dales 10:30 pro la Ütia Piz Boé Alpine Lounge a Corvara: »L’amore non lo vede nessuno« de Giovanni Grasso
16.08 dales 17:30 pro le lech biotop a Corvara: »Il sentiero selvatico« de Matteo Righetto.

Les incuntades vëgn tignides tl salf dles ma­nifestaziuns da Corvara; sce al foss bur’ tëmp, gnará ince i apuntamënc alaleria spostá dales 17:30 tl salf dles manifestaziuns a Cor­vara.
Deplü informaziuns sura la manifesta­ziun ciafon sot ala plata internet www.altabadia.org


Parzival aldedaincö
La 24. ediziun dl festival Badiamusica pëia ia en domënia ai 14 de messé cun le Ensemble Chromoson y le Hofhaymer Ensemble Salzburg
»Parzival Today« é le titul dl pröm teater mu­si­cal che deura la ediziun nöia dl festival Badiamusica, en do­mënia ai 14 de messé dales 21:15, tl salf dles mani­festaziuns da Corvara. Sön pala­dina sarál da aldí le Ensemble Chromo­son y le Hof­haymer Ensemble Salz­burg, cun i protagonisć Johanna Bartz (fabló), Vincent Kibildis (perfor­mance, usc y erpa), André Hinderlich (perfor­mance, usc, conzet, test y video), Philipp Lamprecht (per­cusciuns, per­formance, usc, teater, conzet y direziun musicala) y Matthias Le­boucher (mu­siga y composiziuns). Al sará na inter­pre­taziun de Parzival aladô de Wolfram Von Eschen­bach, che cunta de so tru da »deventé val­gügn«, ci che al impara tres sües aventöres sön tru.


I öspi dla vergina Maria
La domënia ai 21 de messé pîta le festival Badiamusica »Vespers« – öspi particolars tla dlijia de Badia
I öspi é la oraziun liturgica dla sëra. En do­mënia ai 21 de messé dales 20:30 podarán ascuté te dlijia de Badia i öspi dla vergina Maria cun musighes fora dal mez dl 17 secul. Chësta sëra podarán aldí na linia de musizisć dl post y nia: Lia Serafini (sopran), Giulia Gabrieli (mezsopran), Palma Coralis, Marcello Mazzetti & Livio Ticli La Folia, le Barockorchester, Robin Peter Müller y Zsuzsanna Czentrnár ala vidora, Philipp Comploi al basse de violon, Fernando Olivas ala tiorba, le Ensemble Octovox sot la direziun de Andrea Tasser, y Franz Comploi al orghe.
Conzert cun la »Upcycling Music Band«
La band de Max Castlunger lascia aldí süa musiga en mertesc ai 23 de messé dales 21:15, tla Ciasa Runcher a Badia
La »Upcycling Band« é me­tüda adöm dai cater multi­stru­­mentalisć Max Castlun­ger, Manfred Gampenrieder, Georg Malfertheiner y Mir­ko Pedrotti. La partico­larité de chësc conzert, é che ai sonará porí sön stro­mënc y percu­sciuns reali­sades a man da Castlunger, sciöche p.ej. tubofons, gon­gs, xilofons, fablos, saltiers, tambüri y d’atri. Süa musiga é ispirada ales cultures musi­cales dl monn y condüj i ascutadus te n iade musical parti­colar, fora por deplü raiuns de nosta tera.


Curs de ilustraziun
L’EPL – Ert por i Ladins inviëia a n curs de ilustraziun cun Giulia Neri
Pro chësc curs imparon da fá n dessëgn por n placat o por le cuertl de n liber. Le curs é ponsé sides por chi che á esperiënza tl setur co ince por chi che ess ligrëza da porvé fora val’ de nü y á ligrëza da dessigné. Le curs vëgn tigní les sabedes ai 13 y ai 20 de messé, dales 16:00 ales 18:30, te Mareo.
Le cost é de 50,00€ por i mëmbri dl’EPL y 70,00€ por i atri. Por informaziuns plü avisa y iscriziuns él da contaté Irina Tavella al 339 8557964, anter i 12 de messé.


Ticket de un n viers sun la luna
Tla sales dl luech da Pecëi saràl l’ena che vën da udëi n teater da rì
Christian Stl y Armin Grunt à laurà ora l proiet de fé ora dla sales dl luech da Pecëi sales de mostra. Danter scultures y chedri y nscila te n’atmusfera d’ert, saràl l’ena che vën, n vënderdi ai 19 de lugio dala ot da sëira, na reprejentazion de teater da rì. L pez à inuem »One-Way-Ticket zum Mond«, na cu­media scurila scrita da Emmanuel Robert-Espalie, reprejentà dai atëures de Südtirol Hansjörg Ebni­cher (Mon­sieur Cotillon), Gerdi Gufler (Mada­me Cotillon) y Danie­la Santa (lau­ranta de banca). La ntreda costa 15,00 € (cun aperitif). N possa resservé na lerch cherdan su l numer 340 8410782, i posć ie limitei. La luegia de reprejentazion ie tla streda Nuaves 3.


Sonns tla natöra
Incuntada de meditaziun y relassamënt cun i sonns dl gong, amesa la natöra a La Crusc
Ince en chësc isté vëgnel metü a jí dui apun­tamënc de meditaziun y relassamënt acompagná dal sonn dl gong, tla bela culissa dla natöra sö La Crusc a Badia. Ara se trata de na sesciun de massaja dl sonn tres le stromënt dl gong, dles ciampanes tibetanes y de d’atri stromënc, che porta i partezipanc te na fasa de meditaziun y relassamënt.
Na bona ocajiun por se tó tëmp por se instësc y passé n danmisdé alaleria amesa la natöra. Le pröm apuntamënt é söl program en lönesc ai 15 de messé, sura la staziun a munt dl lift »La Crusc 1«.
L’incuntada mët man dales 11:00 y döra apresciapüch n’ora. L’apuntamënt cun i »Sonns tla natöra« gnará ciamó metü a jí le lonesc ai 5 d’agost. Les prenotaziuns al cost de 10,00€ mëss gní fates ti ofizi turistics dl’Alta Badia anter le de denant, o sön la plata internet www.altabadia.org