La Usc di Ladins

Cursc cun Pia Pedevilla
Por mituns da 6–7 agn insö (acompagná), por insegnanc y adulc interessá
Lama & Co.
Sabeda ai 3 d’agost dales 14:00 ales 18:00. Al gnará fat lama, cactus y pompon cun deplü tecniches: de lëgn, de drap o cun Fimo ©.
Le prisc é de 60,00€ plü 25,00€ de material.
»Schrumpffolie«
Sabeda ai 10 d’agost dales 14:00 ales 17:00. Al vëgn fat rocini, morones, portatlés, magnec y d’ater. Le prisc é de 45,00€ plü 10,00€ de material.
I cursc vëgn metüs a jí en colaboraziun cun l’EPL y vëgn tignis tl atelier de Pia Pedevilla (Gross Gerau Promenade 6c) a Bornech. Al vëgn tut sö 6 partezipanc a curs (i acom­pagnadus ne paia nia). Info y iscriziuns pro Pia Pedevilla al 348 2221745 o info@piapedevilla.com

Festa cun inaudaziun
Chësta domënia danmisdé vëgnel tigní te Ciasa de palsa a San Martin na festa da d’isté, cun inaudaziun dl bar nü
La Ciasa de Palsa Ojöp Frëinademetz inviëia döta la comunité, pici y gragn, en domënia, ai 21 de messé, ala festa da d’isté y l’inaudaziun dl »Barjënt«. La festa mët man dales 9:30 cun la santa mëssa dla comunité, zelebrada da don Andrea y acompagnada dai »Turmbläser« da Badia. Dedô sarál n aperitif cun intratigni­mënt musical cina da misdé. Al sará ince n ciantun por i mituns. La Ciasa de palsa se con­forta da ves saludé.

»Miss Mamma Italiana« a San Martin
En doman sabeda ai 20 de messé ospitëia San Martin de Tor les finales nazionales dl concurs »Miss Mamma Italiana Evergreen«
Tl paisc da San Martin de Tor röiel alerch chësc isté le concurs »Miss Mamma Italiana Evergreen« (55+ agn). En doman sabeda ai 20 de messé dales 20:30 gnarál tigní tl salf dles manifestaziuns les finales nazio­nales. La serada é n mix danter defilada de belëza, jüc de abilité y intratignimënt. Danterite tolará la parora ince deplü primars dl spitol da Balsan: deboriada cun l’assoziaziun »Endometriosi Alto Adige Noi con Voi« baiarái dla tematica dla endometriosa, na maratia che é ciamó püch conesciüda, y che atoca indere 1 na ëra sön 7. Düc é bel inviá.

Mostra & aperitif
Le Museum Ladin Ciastel de Tor pîta deplü apuntamënc cun vijites menades ala mostra speziala y dedô aperitif cun musiga dal ví. Le pröm iade ai 25 de messé
Le Museum Ladin inviëia a »mostra & aperitif«, en jöbia ai 25 de messé. En chësta ocajiun vëgnel pité vijites menades fora por la mostra »Countdown to Mass Extinction?« cun le curadú Herwig Prinoth. La vijita menada vëgn proponüda dales 15:00 ales 16:00 por todësch y dales 16:00 ales 17:00 por talian. Dales 17:00 inant podëise Ves gode la sëra sön la terassa panoramica dl Museum Ladin Ciastel de Tor, cun n bun aperitif y musiga dal ví. Al sona Jeanruaz & Marco Stagni Duo.
I periun de na prenotaziun sot a prenotaziuns@musemladin.it o al 0474 524020 por la vijita menada, che costa 10,00€ (entrada tl museum lapró).
Proscimi termins: 01.08 vijita menada zënza aperitif, 08.08 Ganes Unplugged (Elisa­beth y Marlene Schuen), 22.08. L Vin y l Din, 29.08. vijita menada zënza aperitif.

Na cascada de saus
En mertesc ai 23 de messé vëgnel metü a jí a Calfosch, a Plan de Piagn, la manifestaziun gastronomica »Na cascada de saus«
Pro chësc apuntamënt á i amanc dla munt y dla gastronomia la poscibilité da passé n de n pü’ atramënter, cun de bona musiga y tl medem tëmp se lascé vizié dales spezialités gastronomiches amesa la natöra. Por l’ocajiun gnarál pité deplü spezialités tradizionales sciöche tutres y fortaies, bales da polënta y ciajó, pasta ai fonguns y panins ala cianapia, arjignades ca da strotöres y coghi dl post. Na cascada de saus mët man dales 11:30 y döra cina ales 17:00. Ara gnará abelida dales melodies de »Pippi’s friends – Vic e Paolo« y dal »Trio Denis Novato«. Sce al é bur’ tëmp, vëgn la manifestaziun spostada ai 25 de messé. Por arjunje Plan de Piagn pón jí da Corvara o da Calfosch (dal Bistrot dla scora de schi) do le tru numer 28, tla direziun dles cascades de Pisciadú.

I öspi dla vergina Maria
La domënia ai 21 de messé pîta le festival Badiamusica »Vespers« – öspi particolars tla dlijia de Badia
I öspi é la oraziun liturgica dla sëra. En domënia ai 21 de messé dales 20:30 podarán ascuté te dlijia de Badia i öspi dla vergina Maria cun musighes fora dal mez dl 17 secul. Chësta sëra podarán aldí na linia de musizisć dl post y nia: Lia Serafini (sopran), Giulia Gabrieli (mezsopran), Palma Coralis, Marcello Mazzetti & Livio Ticli La Folia, le Barockorchester, Robin Peter Müller y Zsuzsanna Czentrnár ala vidora, Philipp Comploi al basse de violon, Fernando Olivas ala tiorba, le Ensemble Octovox sot la direziun de Andrea Tasser, y Franz Comploi al orghe.

Conzert cun la »Upcycling Music Band«
La band de Max Castlunger lascia aldí süa musiga en mertesc ai 23 de messé dales 21:15, tla Ciasa Runcher a Badia
La »Upcycling Band« é me­tüda adöm dai cater multi­stru­mentalisć Max Castlun­ger, Manfred Gampenrieder, Georg Malfertheiner y Mirko Pedrotti. La particolarité de chësc conzert, é che ai sonará porí sön stromënc y percu­sciuns realisades a man da Castlunger instës, sciöche p.ej. tubofons, gongs, xilofons, fablos, saltiers, tambüri y d’atri. Süa musiga é ispirada ales cultures musicales dl monn y condüj i ascutadus te n iade particolar fora por les con­trades de nosta tera.

Devertimënc musicai
Le festival Badiamusica pîta en lönesc ai 29 de messé dales 21:15 te dlijia da La Ila le conzert »Divertimenti musicali«, cun le Trio Andrea Palladio
Le trio protagonist dl conzert di 29 de messé a La Ila é metü adöm da Michele Antonello, Steno Boesso y Enrico Zanovello. Chësta for­maziun unica cun oboa, fagot y orghe pîta n program original, cun toc de componisć che an lî dainré söl program di conzerc. Dal baroch europeich de Johann Christoph Pepusch (1667–1752) y Giovanni Benedetto Platti (1700–1762) cina al »Miniature Trio« dl au­stralian Alfred Hill (1869–1960). Dala »Toccata pro organo pleno« de Johann Peter Kellner (1705–1772) cina al »Preludio e fuga in Re« de Christian Friedrich Ruppe (1753–1826) y ciamó d’atri. Le repertore se naina fora por la balanza danter i trëi stromënc y porta melodies plënes de pathos, cromatica, ótes armoniches demorvëia y nia usuales.

Gosté da paur
Plü iadi fora por i mëisc de messé, agost y setëmber pón vijité n lüch da paur y se gode spo n bun gosté tl’Alta Badia
Ai 23 de messé mët man la seria de apuntamënc cun le »Gosté da paur« – na iniziativa gastronomica olache al vëgn pité vigni iade sön n ater lüch da paur n gosté cun produc locai. I partezipanc podará vijité le lüch cun le paur y süa familia, ai pó jí te stala y ti ciaré ai tiers denanche se gode n bun gosté cun lat, smalz, üs, pan y d’atres spezialités fates te ciasa. Le pröm apuntamënt di 23 de messé vëgn tigní pro le lüch Larcenëi a Badia, dales 7:45 cun na spazirada cörta che pëia ia da Oies. I atri apuntamënc sará ai 6 d’agost pro la »Dolomites Farm« a Calfosch, ai 3 de setëmber pro le lüch d’Arslada a Badia, ai 10 de setëmber pro le »Bio lüch Ruances« a San Ciascian y l’ultim apuntamënt ai 17 de setëmber pro le lüch »Maierhof« a La Val. Le prisc é de 30,00€ por i adulc, 20,00€ por i mituns dai 5 ai 12 agn y 15,00€ por i mituns sot ai 5 agn. Prenotaziuns ti ofizi turistics dl’Alta Badia o sön www.altabadia.org

Ilominaziun dla Tridentina
Löms y corusc sarál da odëi sö por la via ferata Tridentina, en vëndres ai 26 de messé da sëra
La via ferata plü conesciüda dles Dolomites, che vá dal Ju de Frara cina sön Pisciadú, gnará ilominada cun gran impëgn da n valgügn mëmbri dl grup de alpinisć »Croderes«. La Tridentina é gnüda inaudada ai 10 de messé dl 1960 da Germano Kostner, che á metü en pe le proiet de na via ferata sön la Tor Exner, por rové dire­tamënter pro la ütia Pisciadú. La via ferata é gnüda rovada tl 1967, canche al é gnü metü cordes de metal y rampins cina söinsom y al é gnü fat sö le punt che é le simbol dla via ferata.
La via ferata Tridentina gnará ilominada le vëindres ai 26 de messé, tartan le conzert dla Müjiga Calfosch-Corvara, che gnará metü a jí sön plaza de dlijia da Calfosch dales 21:15 inant. Sce al foss bur’ tëmp, gnarál anulé l’ilominaziun, deperpo che le conzert gnará tigní te salf dles manifestaziuns a Corvara.

La Bira Te Fascia
L Festival de la Bira artejanèla da mont l é chisc dis jun Ischia a Ciampedel. Per l’ocajion na bira spezièla del cedean
Da 10 egn l Festival de la Bira artejanèla da mont se dèsc ju per valorisèr i picoi produtores che auza fora ence cultura, tradizion e identità. Dai 19 ai 21 de messèl ve speton a Ciampedel te tendon jun Ischia con degustazions, labora­tories per picoi e gregn, musega live e legreza.
L é 6 produtores da Trentin, Venet, Pie­mont e Toscana, l concors de la bira preferida e se pel cercèr la bira spezièla del cedean fata en colaborazion con Rampeèr de Ciam­pedel.
- En vender ai 19 l tendon aur da les 16:00 a les 24:00; da les 21:00 musega live coi Fade.
- En sabeda ai 20 l tendon aur da les 16:00 a les 24:00. Da les 17:00 Malt Attack e do Masterclass; da les 21:00 i Satomi Hot Night.
- En domenia ai 21 l tendon aur da les 12:00 a les 24:00. Da les 15:00 e 17:00 Malt Attack e Masterclass, da les 18:30 pre­­miazion ‘Na Bira per l’Istà’ e da sera la Spritz Band.
La Bira Te Fascia é endrezà da la Sociazion Comunicarea col sostegn de Provinzia de Trent, APT de Fascia, Strada dei Formaggi, Comitat Manifestazions de Ciampedel e Sociazion Unionbirrai. Info www.labirate fascia.it; wa 329 9159877; prenotazions: labiratefascia@gmail.com

Conzert tl chît, tratan che sorëdl vá do jö
Por le pröm iade vëgnel metü a jí ai 27 de messé n conzert tl chît, tratan che le sorëdl ilominëia les Dolomites
Le conzert gnará tigní en sabeda ai 27 de messé dales 19:15, pro la staziun a munt dl implant Boé a Corvara. An podará jí sö da sëra cun l’implant portamunt y an ciafa n per de cufies por ascuté musiga ladina tl chît dla sëra, zënza de­sturbé la natöra incëria; deperpo pón se gode la contrada y les munts che deventará de corú cöce y arance. Por tó pert al conzert mësson se scrí ite anter le de denant online o ti ofizi turistics dl’Alta Badia, al prisc de 30,00€; lapró ti gnarál ince pité na boanda de bëgnodü. Do le conzert podarán spo gní jö cun l’implant. Sce al foss bur’ tëmp, vëgn le conzert desdit.