La Usc di Ladins

Nadel te na scatula dai ciauzei
Nce chëst ann vëniel metù a jì l’azion per ti purté mpue de legrëza a mutons de paejes pueresc. N possa dé ju i pachetli tla biblioteches de Gherdëina dai 11 nchin ai 18 de nuvëmber
Te Gherdëina vëniel fat pea pra chësta azion bele da truep ani incà y trueps sà bele nëut y fej pea uni ann. Mutons y mutans che se ncunforta sun chësta scincundes nen iel for assé. Pervia dla ujinanza al’Europa dl Est unirà la scincundes mandedes propi te chisc raions: tla Bulgaria, Serbia, Romania y tl’Ucraina.
N possa mplenì una o nce de plu scatules cun de pitla scincundes, scrijan sun na eticheta sce l ie per n mut o na muta y per ciuna età: 2-4 ani, 5-9 ani o 10-14 ani. Adatà fóssel a les mplenì cun n mescedoz danter roba per scola, de igiena, velch da guant. Sambën ie zeche da se tripé for bënudù. Sun i julantins o sot a www.weihnachten-im-schuhkarton.org iel da abiné cunsëies n chësc cont. I pachetli pòssen dé ju dai 11 nchin ai 18 de nuvëmber tla trëi biblioteches de Gherdëina. Iló iel nce da garat scatules uetes per chi che ne n’ëssa nia una adateda.

Serades cun la mognan Teresa Zukic
La mognan conesciüda Teresa Zukic röia dai 5 ai 7 de novëmber a Corvara y San Martin de Tor, por trëi serades olache ara baiará de dlijia, dl’importanza da ti dé saú ala vita, de mësses por mituns y de co che an pó archité i pinsiers malsagns
Sön iniziativa dl grup KFS da San Martin de Tor y en colaboraziun cun i consëis de formaziun da San Martin de Tor y Corvara, vëgnel metü a jí trëi serades cun la mognan conesciüda Schwester Teresa Zukic.
Nia ma funzioné, mo ince savëi da s’la gode
Le pröm apuntamënt é en mertesc ai 5 de novëmber dales 17:00, tl salf dles mani­festaziuns da Corvara, sot al titul »Wer nicht geniesst wird ungeniessbar!«, olache ara baia de sciöche la porsona proa te vigni situaziun dla vita da funzioné y porté resultac, desmentian n aspet impor­tant dla vita: savëi da s’la gode.
Le monn afascinant dles mëssses por mituns
En mercui ai 6 de novëmber dales 20:00 vára inant te palestra da San Martin, cun le referat »Abenteuerland Kindergottes­dienste«, olache Schw. Teresa Zukic baiará de tan important che al é da abelí ince mësses a mosöra di mituns, por arjunje le travert plü important: entusiasmé i mëndri por Gejú.
Buna nöt ai fistidi
La jöbia ai 7 de novëmber dales 20:00 s’incunton tl salf dl Istitut Ladin Micurá de Rü, por la serada dal titul »Lebe, lache, liebe... und sag den Sorgen gute Nacht«.
Te chësta sëra baia Schw. Teresa Zukic di fistidi y de tan de fistidi por nia che i nes fajun, y ara respognará ala domanda: Co podunse pa tigní sö i pinsiers malsagns y vire nosta vita cun umor y buna löna, ince sce al é dificoltés sön tru?
La referënta
Schwester Teresa Zukic é mognan y pedagoga dla religiun. Cun so talënt da baié, so umor y entusiasm por la fede él na personalité che motivëia y tira para.
Ara á instëssa superé la maratia dal crebesc y é deventada por tröpes porsones na fontana de coraje y ispiraziun tla vita da vignidé. Les serades é dötes debann y zënza prenotaziun. Dötes y düc é inviá da anuzé chëstes ocajiuns.

Mostra y presentaziun
Ai 9.11. vëgnel daurí a San Ciascian na mostra de fotografies vedles y l’edema do vëgnel presenté le liber »I ladini fra tedeschi e italiani«
L’Istitut Ladin Micurá de Rü y le Consëi Cultural tl Comun de Badia á le plajëi da invié ala daurida dla mostra de fotografies vedles, en sabeda ai 9 de novëmber dales 15:00, tla Ciasa J. B. Rinna a San Ciascian. La mostra sará spo daverta dai 10 ai 15 de novëmber, dales 10:00 ales 12:00 y dales 14:00 ales 18:00.
Le vëndres ai 15 dales 17:00 sarál le se­cundo apuntamënt, cun la presentaziun dl liber de Luciana Palla »I ladini fra tedeschi e italiani«.

Baié dan jënt
Ai 12 y 13 de novëmber él a Badia n workshop de »public speaking«, cun strategies, stromënc y tecniches por baié dan jënt: por laur, te na uniun, te n grup de deplü porsones
Le Consëi de formaziun Badia inviëia a n workshop por imparé le förtl da baié dan da jënt; an s’incunta en mertesc ai 12 de novëmber dales 9:30 ales 17:30 y en mercui ai 13 de novëmber dales 9:00 ales 17:00, tla Ciasa J. B. Runcher a Badia.
Te chësc workshop gnarál dé inant les conescënzes teo­riches y les capazités pratiches por baié cun segurëza dan da n publich y fá presentaziuns cun suzes. Referënt é Aldo Menini; les iscriziuns vëgn tutes sö cina ai 5 de novëm­ber tres mail a cf.badia@rolmail.net

Teater a La Ila
Ai 2 de novëmber él a La Ila la premiera dl teater da rí »Lüch Col Plat«. Indöt set rapresentaziuns
L’Uniun Teater La Ila é tl laur da arjigné ca le teater da rí »Lüch Col Plat«. La rejia é de Erika Castlunger, les löms de Luca Pizzi­nini. Sön pala­dina él da odëi Ales­san­dro Bonfanti, Mar­co Moscon, An­dreas Peccei, Andy Pizzinini, Roland Pizzinini, Sabine Ru­diferia, Susann Ta­vella y Cindi Vittur.
Les rapresentaziuns é: sabeda ai 2 de no­vëmber dales 20:30, domënia ai 3 dales 17:00, mercui ai 6, vëndres ai 8, sabeda ai 9 dales 20:30 y la domënia ai 10 dales 17:00, tla Ciasa de Cultura a La Ila. Prenotaziuns al numer 333 2525740.

Cunzert dl Sweet Alps Orchestra
L sarà inò da scuté su n cunzert urganisà dai Jëuni de Mujiga Gherdëina
N mierculdi ai 6 de nuvëmber dala ot da sëira saràl, tla Cësa di Cungresc a Urtijëi, l cunzert dla grupa SAO/Sweet Alps Orchester. L se trata de na grupa che sona mujiga populera y jazz. Da audì saràl elemënc di Balcans dl’Africa y elemënc dl’Elpes, mescedei cun jazz y truepa mpruvisazions. L Sweet Alps Orchestra ie nasciù tres n proiet de Michael Lösch tl ann 2005.
Matthias Schriefl, Paolo Trettel y Klaus Dickbauer sunerà la tumbrëta, Achille Succi y Christian Maurer l tenorsaxofon, Helga Plankensteiner sunerà l baritonsaxofon, Federico Pierantoni y Peter Cazzanelli la po­sauna, Michael Lösch l tlavier, Glauco Benedetti la tuba y Matteo Giordani y Marco Soldà la bateria. I Jëuni de Mujiga Gherdëina se ncunforta sun vosc unì!

»Amur da tosser! Él amur sce...«
Serada cun mësa torona sura la violënza sön les ëres, ai 8 de novëmber dales 19:30, tl Istitut Ladin Micurá de Rü a San Martin de Tor
Vigni terza ëra o jöna á vit o vir na esperiënza de violënza. Te na fila de porsones, ól dí che la ëra sön mia man dërta o sön mia man ciampa vir o á vit na esperiënza pesocia de violënza! Le fat che tl 2023 él gnü copé 120 ëres y che chësc ann compëdon bele la 92. vitima, fej dër ponsé.
La violënza pó se mostré te n gröm de formes y fasettes. Gonot ne vëgnera te n pröm momënt gnanca odüda sciöche violënza. Canche le partner (baldi se tratera la gran pert dl ël, mo nia ma!) controlëia le fonin dla ëra, la ofënn o la sforza a aziuns sessuales nia orüdes, o la gelosia tla copia é esagerada, sce la ëra mëss dé jö sü davagns o ara ne á nia azes ai scioldi tla cassa, sce la ëra vëgn porsighitada sön le post de laur o te ciasa: chëstes é formes de violënza dër subtiles, mo dër ries da soporté. Ares porta a n gran pëis psichich y fisich che porta la porsona a ne ester nia plü bona da vire normalmënter.
Mo ci stá pa do ia? Co vára pa da controlé plü saurí situaziuns de agresciun o ince da azeté plü saurí canche na storia é rovada? Ci rode á pa la ëra te nosta sozieté y ciun pa l’ël? Cun ci valurs pa? Ci y che pó pa daidé da ciafé na soluziun?
Adöm ai referënc de chësta serada Ingrid Palfrader – responsabla dl Sorvisc Ciasa dles ëres Val de Puster, Giuliana Franchini – psicologa y psicoterapista, Michael Benetti – Caritas Consulënza por ëi, Jasmin Ferdigg – moderadëssa y jornalista y Simon Kostner – moderadú y regista, ciararunse a deplü aspec de chësta tematica che dess se sensibilisé a ciaré plü avisa.
Düc é dër bel inviá, ince al pice renfrësch che sará dedô por se baraté fora.