La Usc di Ladins

Posses’a te prejenté n curt?
Bon dì a duc, son Marina Pera­thoner é 26 ani y son de S. Cristina.

Cie fejes’a de lëur?
Lëure śën bele da plu ani incà tla rezezion de n hotel te Sëlva.

Cie te sà pa bel a fé te ti tëmp liede?
Mi majera pascion ie balé y passé perchël gran pert de mi tëmp liede a me alené y me njinië ca per la garejedes nternaziuneles pra chëles che feje pea. Oradechël me anconti gën cun mi cumpanies y vede gën samont d’instà y d’inviern cun i schi.

Te es dit che te bales scialdi gën, nes contes’a velch deplù?
Ie me dé ju bele da plu ani incà cun l line dance. L se trata tlo de na forma de balé coreografeda pra chëla che i balarins y la bala­rines, cuncei su te de plu linges, bala pra mujiga country y pop. Nasciù ie l line dance tl’America, ma l vën for praticà deplù nce tl’Europa. Tla Talia ne n’ie chësta forma de balé mo nia drë’ cune­sciuda, ma si popularità ie ti ultimi ani scialdi chersciuda. Suvënz cunlieien l line dance cun l balé pra mujiga country, scebën che l à scialdi plu da pité. L line dance à bai y coreografies desfrëntes che n con’ de si semi­anza a d’autri stii de balé, possa unì partì su te ot bai: l East Cost, l West Cost, l Nightclub, la Polka, l Walzer, l Cha Cha, l Funcky y l Showdance. (Ntervista de Sara Senoner)

De plu tla edizion stampeda de La Usc di Ladins o sun l e-paper a paiament www.lausc.it/e-paper