La Usc di Ladins

Ai 19 de agost ie l prim ntervënt tla Ladinia stat tert domesdì tla Val Badia, ulache doi escurscionisć tudësc ne se nfidova nia plu da Puez ju sun l troi numer un, ulache l ie n toch de fereda, ajache l fova lize do che l ova pluët. Un di doi fova jit n panich y nscila iesi unii ciariei cun 75 metri de binda y purtei al segur a Badia.
Do la ot da sëira à l joler dl Aiut Alpin fat pea pra la prejentazion dla grupes de sucors a Santa Cristina tl Zënter Iman (coche bele repurtà tla plates de Gherdëina tl’edizion dl’ena passeda, ndr.). Ai 20 de agost fòvel da fé n ntervënt per n’ëila che fova tumeda te cësa y se à rot l os dla cuessa. L ie unida meneda tl spedel de Persenon.
Ai 21 de agost do marënda fòvel da julé a Al Plan, ulache n ël de tëmp dl post à abù problems cardiologics. Do la prima cures deberieda cun la Crëusc Blancia, iel unì menà cun l joler tl spedel de Burnech.
Daldò iesen julei pra la utia La Crusc, ulache n’ëila se ova fat n tai al cë. Do la prima cures deberieda cun i Judacrëp de Badia l’àn meneda cun l joler tl spedel de Burnech.
Puech do iel stat n ntervënt te Fanes, ulache n escurscionist talian à abù n colp de deblëza. L ie unì menà cun l joler tl spedel de Burnech.

De plu tla edizion stampeda de La Usc di Ladins o sun l e-paper a paiament www.lausc.it/e-paper