La Usc di Ladins

Ai 11 de setëmber à la zentrela de Bulsan cherdà l joler pe n nzidënt cun na roda sun Mont de Sëuc: n ël dla Talia se ova rot l os dla cuessa. Do la prima cures iesen julei limpea tl spedel de Persenon.

Ai 12 de setëmber à la Crëusc Blancia damandà do l joler te Sëlva, per n pazient amalà - ël ie julà cun l Aiut Alpin tl spedel de Bulsan.

Ai 13 de setëmber, dala 20:44 ie i Judacrëp Gherdëina unic cherdei per jì a ti judé a doi persones che ne ruova nia plu inant sun l troi che va da Forces de Sieles de viers dla utia Puez. L manciova mé plu doi chilo­metri per ruvé pra la utia, ma l fova unì scur, l nevova y l vënt buiova dassënn. Nscì àn riesc metù adum na grupa per jì a ti judé - nce l ost dla utia, deberieda a n judacrëp, ti ie jit ancontra ai melcapitei y l Pelikan 2 à ciarià n judacrëp per purvé a ti ruvé permez.