La Usc di Ladins

L recordon semper, l hockey di più joegn l é crescimonia, individuèla e de squadra. Mioramenc, amicizia, devertiment. I setores mendres cogn coltivèr la pascion, i valores, la legreza. E venjer no èl emportanza? L é cert da dir, ma no, ti setores mendres no l é chest che conta.

No passa giornèda che i picoi falchec no abie mingol de spas su la giacia. Dai arcedamenc a la partides. En sabeda ai 4 de november l é stat n tornoi da peconc per la categoria U.12 a Piné, olache l Fascia à jià dessema a Fiem, Trent e apontin Piné. La squadra fascèna, che èa vèlch defezion a cauja del pènt di Sènc, l’à fat afidament ence su cinch bec de la U.10 per se jièr l tornoi. L resultat l é stat belebon e l à dat l met de creèr maor union anter bec de età desvalives. L devertiment de duta chesta picola categories, da la U.8 a la U.12, l rua aboncont ence da desvaliva scomenzadives metudes su la giacia da la sozietà del Fascia. A tèl propojit, tel ultim week end de otober l era jit en scena al Scola de Dèlba la tradizionèla partida anter bec e genitores, che porta scialdi trop spas. Soraldut per i »bec… più gregn«!

Dapodò sozede che doi formazions fascènes, chela de la U.14 e de la U.19 les se troe a jièr en trasferta tel medemo stadie, l medemo dì. Al Zenter Sportif Plebiscito de Padova en mercol prum de november l é donca jit en scena na dopia endesfida anter Padova Waves e Fassa Falcons, e la sozietà se à pissà ben de endrezèr na soula trasferta con duc i bec.

Duc i resultac de le Under su La Usc de en vender ai 10 de november.  (Daniele Verra)