La Usc di Ladins

I campionac mendres de hockey era cec, ma l é stat na setemèna rica chela di Falcons. Anter tornoes da peconc, Comitat Trentin e formazions Nazionèles beleche ogne categoria à vedù bec empegné chiò o lo.

L U.10 à jià n tornoi en vista de la gran endesfida de Asiago
La formazion U.10 di Falcons à jià la seconda giornèda de campionat trentin en domenia ai 12 de november a Trent.

L U.14 venc l tornoi di Comitac, pruma esperienza per 4 bec de la U.12
Anter i 11 e 12 de november l é stat ence dat lèrga a la raprejentatives Under 14 di Comitac Regionèi de la FISG. En ocajion del 2° Tornoi Memorial Claudio Franceschini la squadres de Trentin, Sudtirol, Lombardia, Piemont e Veneto les se à troà al PalaFeltre per na doi dis de endesfides. Ence trei bec fascegn, l atacant Luis Bernard e i portieres Andreas Fosco e Davide Gross, à tout pèrt al tornoi.

I bec più gregn con la maia Azzurra
Endèna l stop di campionac, se à tinultima binà ence la formazions de la Nazionèles taliènes de duta la categories, da la Juniores a la Senior.
Volon segnalèr i empegnes de la formazion U.17 e U.20, olache l é stat chiamà respetivamenter l defensor di Falcons Christopher Bettega e l atacant Igor Cassan.

De più su La Usc stampèda de en vender ai 17 de november del 2023  (Daniele Verra)