La Usc di Ladins

La é en program en vender ai 30 de aost al stadie Pranives de Selva da les 20:45 la ultima partida del Tornoi ladin Elite de Hockey 2024. 

Chest tornoi, nasciù del 2018 per endrez de la sozietèdes de hockey de Fascia, Gherdëina e Cortina e ruà a la 7^ edizion col patrozinie de l’Union Generela di Ladins dla Dolomites, l é na bela ocajion per ge dèr l met a la trei squadres ladines maores de se confrontèr e se cognoscer, fèr mingol de arceda­ment dant dal scomenz del campionat e ence de ge sporjer n spetacol sportif ai ghesć che te chest meis rua te noscia valèdes en feries. 

Chest an a fèr maor festa sarà l H. C. Gherdëina, che canche mencia amò doi partides l se à jà metù te guofa la venta. L Gherdëina l à defat vent la pruma doi partides contra l Cortina: la pruma col resultat de 4 a 0 te cèsa e la seconda con n bel 2 a 9 vin Ampez. I jiadores del nef coach (jà alenador del Fascia ti egn passé) Teppo Kivelä i é dapò jic a jièr ta Dèlba contra l Fascia en mèrtesc ai 20 e ence chiò i é stac bogn de aer la venta per 5 a 3. 

En jebia ai 22 de aost l Fascia é jit vin Ampez e contra l Cortina, che endèna l é stat bon de meter su la giacia vèlch forza neva, i fascegn i à perdù per 9 a 1 e a chesta vida i ge à arsegurà la venta del Tornoi a Gherdena.

Doman mèrtesc ai 27 de aost da les 20:45 al stadie Scola de Dèlba se podarà veder la partida de retorn anter chesta doi squadres e dapò en vender ai 30 apontin a Selva  sarà l ultim confront anter Gherdëina e Fascia e la premiazions.

L Gherdëina, che aea vent la pruma edizion, concosta donca la seconda venta; ence l Fascia à al atif doi ventes, del 2021 e del 2022 e l Cortina resta endèna prum, con 3 ventes del Tornoi Ladin: del 2018, del 2019 e del 2023.

 (Lucia Gross)