La Usc di Ladins

Tla fin dl’edema passada él sté a Umhausen döes gares de copa dl monn de liösa sön pista naturala. Pro la pröma gara á Florian Clara arjunt süa terza devënta dla sajun, pro la secunda - na gara a eliminaziun - ál stlüt jö al cuarto post. Porchël aspeton sëgn cun gran emoziun al’ultima gara dla sajun, che sará ai 22 y 23 de forá a Nöia Todëscia. La classifica generala tl singul di ëi vëiga al pröm post l’austriach Michael Scheikl al 1. post cun 495 punc, tratan che Florian Clara é toch iadedô secundo, cun ma 5 punc demanco: 490. Chël di dui che sará dancá tla ultima gara, se assigurará porchël ince la copa dl monn. 
Al é indere ciamó n ater gran capitul che vá a piz pro le final dla sajun, deache en chël de stlujará jö la cariera 3 de gran campiuns che á scrit la storia de chësc sport: Evelin Lanthaler, Patrick Pigneter y ince nosc Florian Clara, che complësc propi incö sü 37 agn. Döt le bun.

Clara y la poscibilité da stlü jö la cariera cun na copa dl monn
Chiló n valgönes zifres: Evelin Lanthaler á davagné 9 copes dl monn, á arjunt 57 devëntes pro gares de copa dl monn, 5 medaies d’or pro i campionac dl monn y 5 pro campionac europeics. Patrick Pigneter á tl singul di ëi arjunt bëgn 12 copes dl monn y 54 devëntes; al á davagné trëi medaies d’or pro campionac dl monn y 4 pro campionac europeics. Ciamó damí ésera jüda tl dopl, deboriada propi cun Florian Clara da Lungiarü: ai á arjunt 13 copes dl monn, 68 devëntes, 5 medaies d’or pro campionac dl monn y 4 pro campionac europeics. Y a chisc resultac s’injunta por Florian Clara les trëi devëntes tl singul, arjuntes dötes te chësta sajun. Por ël fossel propi la incoronaziun, sce al davagnass ince l’ultima gara de chësta sajun, stlujon jö spo la cariera agonistica cun süa pröma copa dl monn tl singul. I ti tignun i pügns.  (pablo)