La Usc di Ladins

La dezijion definitiva é stata touta tel Consei de Comun chiamà ite online en jebia ai 17 de dezember. Aldò del coma 4 de l’articol 84 del CEL (Consei di Enc Locai), con 9 stimes a favor, 4 de contra e 1 astegnù l’é stat dezidù per l’incompatibilità a l’encèria de conseier de Comun de Moena de Riccardo Franceschetti. E ajache medemo resultat à abù ence la litazion percheche la dezijion la vae en doura sobito, Franceschetti à cognù se destachèr da la videoconferenza. Riccardo Franceschetti no l’é più donca conseier de Comun de Moena. Per beleche trei meisc l’é jit inant na costion engatièda e per nia sorida, ence dal pont de veduda uman, che cognea fèr fora la costion de incompatibilità de Franceschetti per no aer paà la steores de Comun. L’ultim Consei aea dezidù de ge lascèr amò etres 10 dis al conseier de mendranza per se meter a post. »Da Franceschetti te chest temp no aon abù nesciuna resposta - à dit l’ombolt Alberto Kostner - e no ne resulta che l’aesse comedà ite sia posizion. A chest pont penson che sie ora de tor na dezijion per na costion de trasparenza e de chiareza ti confronc de duc nösc sentadign.«

L Consei à tout dant doi pareres domané su la costion: chel del Consorzie di Comuns che fèsc referiment a caji valives che disc che n conseier te chesta situzion no pel stèr te Consei e chel sotescrit da n funzionarie de la Region Trentin Sudtirol che disc che tel temp de pandemìa l’é stat sperlongià duta la scadenzes di paamenc ti confronc del Comun e donca per chest no vèl l’incompatibilità. L conseier Franceschetti, sostegnù da sia lista, à domanà amò temp per fèr autra verifiches. »No capesce duta chesta gaissa de fèr fora n conseier de comun« l’à dit. E l’à jontà apede che pel esser ence che l fae recors tel cajo che la delibera no sie aldò de la lege.

La maoranza de Comun à dezidù de serèr sù la costion e l’à lità per l’incompatibilità. Dò l’ejit de la litazion la capogrop Manuela de Pellegrini à fat a saer che per protesta dut l grop de mendranza »Jent per Moena - Ripear da nöf« aesse lascià la sentèda e coscita l Consei é jit inant demò con la maoranza.