La Usc di Ladins

En sabeda passèda a Soraga l é stat inaugurà la »Ciasa di bec«, olache apede a la scolina dal meis de otober passà à podù peèr via l nef servije de la coa di fantolins, che te Fascia amò mencèa.

L é stat l’ocajion de veder la senta ensema con la referentes de La Coccinella, la Coprativa da Cles che à tout su la gestion de chest servije, e de rejonèr de coche l é stat endrezà e de coche l jirà inant ensema con la presidenta Francesca Gennai, la coordenadora pedagogica de la Coprativa Elisa Bonapace e la coordenadora del endrez a Soraga Lorenza Soldà.

»Le enscinuazion vegn fate aldò del sistem provinzial – ne à dit anter l auter Lorenza Soldà – le vegn fate de mé per jir ite de otober, de otober per jir ite de jené, ma se se libra valch post i pel vegnir ite, aldò de na graduatoria. Chesta part de le enscinuazion e de le graduatorie la é gestida dal Comun General de Fascia, chi che à besegn de informazion i cogn se oujer al ofize Afares Generai del CGF da Devi Brunel. La jent de Fascia la cogn emparar a se usar a chest sistem, che l é chel provinzial desché per le scoline. No l é desché per le Tagesmutter che se pel domanar de jir ite do e do se l é post, chiò se pel scriver ite i bec de mé, de otober e de jené.«

De più su La Usc stampèda de en vender ai 5 de messèl.  (Lucia Gross)