La Usc di Ladins

Te la setemèna del azet te Fascia l é stat metù dant na lingia de evenc: dal teater coi Bontemponi e con la Filodramadica de Lavis e la Sociazion Fiemme Fassa Sport Inclusivo per ‘esser’ comunanza ence ti momenc de spas e legreza, a la festa per i giaves col confront anter generazions, a la proponeta de bal terapeutich. En cont de chest, en vender ai 4 de otober te tester del oratorie de Poza l é ruà da Trent  n grop de balarines e balarins de la soziazion »Tango al buio« con la maestra de bal Simona Niero.
L é stat desmostrà che l tango l é de gran aiut tant per contrastèr l smendrament cognitif e autra malaties degeneratives che per creèr ocajions per fèr comunanza. Per chest, en colaborazion con Spazio Argento, tel chèder del Pian de Trei egn per l svilup de na Comunanza Amica de la persones con demenza l é stat endrezà 3 corsc de tango con Simona Nieri, un resservà ai utenc del Zenter de enconter, un per chi che à più che 65 egn e un per duc. I enteressé cogn se oujer ai Servijes sozio-assistenzièi del CGF (tel 0462.764297) dant dai 15 de otober.

De più su La Usc stampèda de en vender ai 11 de otober.   (Lucia Gross)