La Usc di Ladins

La rissa finala sot na desëna de agn de stritoc aministratifs, politics y ideologics ê gnüda trata dal Consëi de Stat cun la sentënza publicada cun data 1. de messé 2021 söl recurs cun numer de register general 3012 dl 2015.
Cun chësta sentënza êl definitif: la strada söla Munt de Antersasc danter Lungiarü y Pöz pó gní fata inant cina söla munt y les stales.

Al é sté na taia lungia, n brac de fer danter i patruns dla munt, i ambientalisć, les comisciuns, l’aministraziun publica y deplü signories te sëntes dala provinzia cina ai palac plü alc de Stat a Roma. Le patrun dla munt Johann Mair é dër contënt dla dezijiun tuta a Roma, le presidënt dla Lia provinziala dla defenjiun dla natöra de Südtirol Klauspeter Dissinger á dé pro che la dezijiun finala da Roma é n stlaf al’ecologia: indó n iade á l’economia trat dant ai valurs y a na vijiun plü 'vërda' tl dagní.

Les ultimes edemes (le retrat é dl de 20 de setëmber 2022) é tröpa jënt dal post y sciori rová te Antersasc y é romagnüs atocá dala vera y dal movimuent de terac. Nia düc ne capësc che al vëgn lauré sö la cortesc por fá na strada pormez a na munt tan chîta y idilica. Mo ince i patruns te nostes munts á sües rajuns: ne fá nia tles munts ó dí dé sö la munt: cun la pascentada y na gestiun che i sperun che sides indoman plü tradizional/agricola co gastronomica.