Indoman, sabeda ai 16 de setëmber 2023, podará pié do Tone Gasser da San Martin de Tor la "Crusc de Mirit" dl Land Tirol, adöm a nü d’atres porsones, te n at ofizial y solën tl Ciastel Tirol sura Maran
La Provinzia da Balsan, che partësc fora adöm al Land Tirol, les Crusc de Mirit, à cernü danter i 10 da premié ince Tone Gasser desco ladin y porsona che s’á fat n gröm de miric tl ciamp cultural dla Val Badia. La Provinzia scrí: "miric desco ativist dla cultura y autur de n gröm de tesć y publicaziuns tl lingaz ladin".
Tone Gasser é sté secreter de comun y á daidé avié laota dl 1989 l’aplicaziun dl lingaz aministratif ladin ti comuns ladins dl Südtirol. Lapró él sté dî atif tla Uniun di Ladins Val Badia y tla redaziun (en pert ince traduziun) di tesć dla liturgia ladina y cianties che á ciafé lerch ultimamënter ince tl liber de cianties y oraziuns nü dl‘EPL-Ert por i Ladins "Laldun le Signur".
Deplü podarëise lí do te otedé tla ediziun stampada de La Usc di Ladins!
