La Usc di Ladins

La Diozeja de Balsan/Porsenú ti á dé la poscibilité a dodesc seminarisć – 10 dala Tanzania y 2 dal’India – da gní tl Seminar da Porsenú a fá sü stüdi da prou. Rová alerch ési bele da d’altonn dl 2021, olache ai n’á nia ma podü mëte man da studié, mo gnô ince ospitá vigni chinescdé te ploanies dla diozeja. Tla bassa Val Badia él insciö rové alerch Ditrick Titus Makali, che á, deboriada cun siur Klaus Sottsas, podü odëi plü davijin la vita dles ploanies di comuns da San Martin y de Mareo. Sëgn, do passa dui agn, él gnü le momënt por i seminarisć da jí indô n iade a ciasa, y por nüsc proi da jí a vijité süa patria. Ai 12 de messé mët man n iade cun la diozeja jö tla Tanzania, a chël che al tolará pert i proi che á ospité n seminarist, acompagná dal Vësco Ivo Muser, dal Vicar General siur Eugen Runggaldier y dal Regens dl Seminar siur Markus Moling. Da d’altonn rovarál alerch tla bassa valada seminarisć nüs.

Deplü t’La Usc di Ladins di 12 de messé  (pablo)