La Usc di Ladins

»Esser comunanza: duc i colores del azet« l é l slogan che caraterisarà l’otava edizion de la Setemèna del azet. Te chesta setemèna l C.N.C.A. (l Coordinament Nazionèl Comunità de Acolienza) vel portèr dant na lingia de scontrèdes, de analises, de scomenzadives, azions e bona prateghes per tor ite e contaminèr la comunità entornvia l segnificat de la parola acolienza percheche la sie bona de slarièr fora sia cognoscenza e de ativèr azions e coscienzes.

Fèr acolienza vel dir crescer ensema, emparèr a entener de che che i à de besegn chi che vegn touc dant per ge dèr deretorn degnità e davegnir a chi che i ge é stac touc. L bez che vif condizions de dejèje, l veiat soul, chi che é zenza lurier, la persona soula e scherdeila o malèda, chi che sciampa da teres de conflic e meseria, chi che à perdù ogne speranza. Ogne femena e om che fèsc fadia.

Ence te Fascia vegn metù a jir la Setemèna del azet per endrez del Comun General de Fascia col patrozinie del Comun de Sèn Jan e la colaborazion de la Crousc Checena, de la Scola Ladina, del Comitat manifestazions de Poza e de la Coprativa sozièla Progetto ’92, sot l slogan ‘Ge dajon color e ousc al azet’.

En mercol ai 5 de otober dadoman te senta del Liceo artistich de la Scola Ladina de Fascia vegn metù dant perfomance artistiches dintornvia l argoment ‘i colores del azet’ per endrez di studenc.
Semper en mercol ai 5 de otober da les 20.30 te sala de Consei de Comun de Sèn Jan l é na scontrèda per ge moscèr ai sentadins la scomenzadives metudes a jir te Fascia per tor dant la families ucraines che à cognù sciampèr da la vera con la moderazion de la giornalista Lucia Gross.

En vender ai 7 de otober da les 17.00 semper te sala de Consei de Comun de Sèn Jan l é na conferenza per endrez del professor Stefano Aloe, slavist, storich de la letradura russa e de la relazions culturèles italo-slaves. Da les 7 da sera te tendon de la manifestazions de Poza sarà n’apericena per la families ucraines che stèsc te Fascia e per chi che ge à dat alberch en colaborazion col Comitat manifestazions de Poza. Da mesa les 9 da sera se podarà se goder con cianties per lengaz ucrain e l conzert del grop Cajones. Se arà l met de veder la operes fates da la studentes ucraines e i lurieres di studenc del Liceo artistich endèna la performance artistica dai 5 de otober.