La Usc di Ladins

En sabeda prum de otober l é stat endrezà a Riva del Garda per la pruma outa la ‘Garda lift on fire’, na garejèda dalbon ria e fora de anter resservèda ai studafech. Ence desvalives volontères de Fascia à tout pèrt e un de ic l é ruà sul podie.

L percors tachèa via dal piaz 3 Novembre col travert sunsom l Torrione del Bastione. La garejèda passèa timpruma fora per la strèdes del zenter storich per dapodò tor la scèles de segureza del lift panoramich che mena fin sul Bastione, che les dombra passa 600 sciaieres, per n total de 500 metres, n dislivel de 150 e na pendenza che va da 28 a pizes adertura del 91%.

Per i concorenc l obietif l era ruèr fin a la fin del percors segnan l mender temp zenza fenir l’aria te la bombola e regolà su da studafech. I partezipanc à tout pèrt con tel dos autoprotetor (bombola e maschera) e i dpi EN 469 che fossa la devisa che vegn durà te n mèl de fech, con caschet e ciuzé pesoches. En dut l peis da se tor do l era presciapech de 25 chili.

Sun 157 partezipanc rué ence da Slovenia, Republica Ceca e Austria, l studafech del Corp de Cianacei Ludovico Dezulian l é ruà sul 3° sciaier del podie col temp de 8’27’’50.

De più su La Usc stampèda de vender ai 13 de otober.  (Nicoletta Riz)