La Usc di Ladins

L Covid te chisc doi egn à ferà n muie de ativitèdes, ma no cheles di Studafech de Fascia. Enceben la pandemia l grop de 150 volontères del Distret fascian à seghità a se dèr ju, te vèlch setor i é stac amò più indispensaboi, ensema ai etres gropes de volontadives de la val.

La festa del Distret per la partrona Sènta Bèrbola, stata en sabeda ai 4 de dezember te tendon de la manifestazions de Poza, l é stat la ocajion giusta per i rengrazièr e per dèr fora i recognoscimenc a chi che à arjont i traverc torons de atività.

Dantfora don Andrea Malfatti à ofizià messa per preèr la protezion de la Sènta che ensema a Sèn Florian vèrda via i Pompieres. Te la pardicia don Andrea à tout su la paroles che l President Mattarella ge à out ai Studafech: «Siede l pont de referiment te la emergenzes«.

Do aer recordà l numer unich de emergenza 112 l Ispetor de Fascia Alessandro Pellegrin à metù dant i numeres di intervents di egn 2020 e 2021, ajache l an passà no i aea podù endrezèr la radunanza. 

Do aer moscià vèlch video sui desvalives corsc de formazion, anter chisc un enjignà dal vizeispetor don Mario da portèr fora per la scoles, l é stat i saluc ofizièi da man del President de la Federazion Giancarlo Pederiva, de la senatora Elena Testor che l’à recordà che acà pec dis ge é stat dat l ultim salut a Giorgio Testor stat comandant di Studafech de Cianacei, del procurador Giuseppe Detomas e del ombolt de Sèn Jan Giulio Florian.

Duc i comandanc é stac rengrazié, un per un, e n develpai particolèr é jit a Bernardino Zulian che é amò semper n muie atif e a Rinaldo Debertol stat al lonch Ispetor.

De più su La Usc stampèda de vender ai 10 de dezember.  (Monica Cigolla)