La Usc di Ladins

Sènt’Uiana veia, che aldò del calandar de Sèn Gerolem, croda ai 3 de jugn, à abù chest an gran luster. La comunanza cristiana de le parochie vidade da don Andrea Malfatti, en domenia ai 5 de jugn, é jita en pelegrinaje fin sun Ciaslir de Vich per rengraziar e prear la patrona Sènt’Uiana.

N bel grop de jent é pontada demez a pe da sie paisc, da Soraga, Vich, Poza e Pera, e do l percors l’à preà e ciantà. Da mese le undesc tedant la capela dedicada a la Madona de le Grazie don Andrea, ensema a don Erminio Vanzetta e l diacon Antonio Ghetta, à ofizià messa grana ciantada dai corisć de duc i cores parochiai adum.

»Sion chiò soraldut per doi rejon – à dit don Andrea te la perdicia – per rengraziar che sion fora da la pandemia e per prear per la pasc tel mond.«

A la fin de la messa l é stat sonà per 7 oute la ciampana de la pasc, di ladins e de le mendranze, set oute percheche l é l numer de la perfezion, à spiegà don Andrea, e dapò la Musega da Vich à sonà n toch per la pasc. La benediscion solene con la statua de Sènt’Uiana e la ciantia dedicada a la sènta patrona à serà su la zelebrazion liturgica e dapò duc à podù cerciar i bogn grostoi enjigné dal grop de volontadive da Vich e scutar le sonade de la Musega.

De più su La Usc stampèda de en vender ai 10 de jugn del 2022.  (Monica Cigolla)