La Usc di Ladins

Le fin prinzipal dl proiet é chël de promöie la motivaziun y le svilup musical di mituns y dles mitans. Ai y ares á la poscibilité da soné adöm a n grup de compagns y compagnes che partësc la pasciun por la musiga y olache la desfarënzia d’eté ne é nia grana. I mituns y les mitans impara cosses de basa che reverda le soné, da se ascuté sö un cun l'ater, da mëte averda al dirighënt/ala dirighënta y da contribuí individualmënter cun ligrëza y impëgn al bel garaté de n toch musical. La Musiga di Jogn é na bona basa por alisiré l'integraziun di jogn y dles jones tles musighes de nüsc paisc y é insciö ince n gran aiüt por les musighes instësses, che adora tres indô forzes nöies por jí inant te süa ativité.
Inviá a tó pert é düc i mituns y dötes les mitans di paisc dla Val Badia, che stlüj jö cun l’ann de scora 2022/2023 le 2. ann d’insegnamënt de n stromënt a fle o dles percusciuns.
Le proiet mët man cun n „Workshop” da soné de dui dis, che vëgn tigní ai 3 y ai 4 de messé 2023 tla scora elementara da La Val. Te chisc dui dis á i mituns y les mitans l’ocajiun por imparé a se conësce danter ëi y ëres, fá les prömes proes cun la Musiga di Jogn y imparé ite i toc musicai che i acompagnëia fora por döt le proiet.
Do i dui dis de workshop vá les proes inant fora por l'isté. Chëstes vëgn de regola baratades jö danter le salf dles proes dla Musiga da La Val, da San Martin y da Badia, a na moda che düc i mituns y dötes les mitans mësses n pü’ se sposté. Les iscriziuns vëgn fates online sot al link https://form.jotform.com/230575747053358 y é davertes cina ai 15 de ma 2023.

Sön la Plata di Jogn t’La Usc di Ladins ciafëise plü informaziuns y düc i numeri de contat di verdajogn dles musighes. Lapró él sön la medema plata ciamó d’atres iniziatives che reverda nosta jonëza.