La Usc di Ladins

Ai 15 de otober, con delibera de la Jonta provinzièla de Trent n. 1713/2021, l é stat serà su l iter de aproazion del nef blason del Comun General de Fascia, studià fora aldò di criteries de l’araldica. 

Con chest ultim passaje doventa donca ofizièl l nef dessegn del Pèster de Fascia, che era stat aproà dal Consei General amò de oril del an passà.

Chesta aproazion respon al Statut del Comun General, che scrif dant che i simboi identificatives de l’istituzion l é l pèster, l in e la bandiera, ma l iter per dezider chisc simboi se à moscià belebon lonch. 

I lurieres defat era ponté via amò del 2012, canche la Jonta del Comun General ge aea dat su a esperc de araldica l’encèria de na consulenza e a na Comiscion istituzionèla de dezider l blason, che cognea raprejentèr la fegura veiora del Pèster Fascian storich depent del 1607 che l é tel Palaz vescovil de Persenon e che raprejenta la veia Giurisdizion de Fascia (Herrschaft Eves).

Ades l Comun General de Fascia à ofizialmenter n so blason, che estra che esser n simbol istituzionèl, l à ence na valuta sozioculturèla, ajache l raprejenta la sintesa del percors de na comunanza de mendranza che, tras n sie ent comunitèr storich – doventà anchecondì n ent istituzionèl local – la vel seghitèr a vardèr inant, col mantegnir e portèr inant sia identità e sia rejonèda ladina.

De più su La Usc stampèda de vender ai 19 de november.  (LG)