La Usc di Ladins

L era da n trat che la Stazion de Socors da mont Auta Fascia pissèa che fossa stat bel meter a jir na garejèda de rampinèda sportiva anter i socoridores de la valèdes ladines. Chest an zacan la é jita fata e ai 28 de setember l zenter de Ischia a Ciampedel e la strutura de rampinèda ADEL vegnarà viventé da la pruma edizion de chest bel event sportif ladin, che l é endrezà apontin dal Socors Auta Fascia adum col Fascia Climbing e l CNSAS (Corp Nazionèl de Socors Alpin e Speleologich) provinzièl, col patrozinie del Comun General de Fascia e de l’Union Generela di ladins dla Dolomites e col sostegn de La Sportiva.

»Chesta garejèda, che à inom Ladinia Cup, – ne à dit l Capostazion del Socors Auta Fascia, Igor Dantone – aon pissà de ge la dedichèr a Gino Comelli, che l ne à lascià chest an e l é stat per n muie de egn nosc capostazion. L é l prum Memorial Gino Comelli, ajache volassane che dapò chest event de confront sportif anter i socoridores l posse jir inant ence ti egn che vegn.

La garejèda la é resservèda demò ai componenc di gropes de Socors da mont de la valèdes ladines: Fascia, Gherdena, Val Badia e Fodom con Ampez. Pel tor pèrt fin a 20 socoridores per valèda, e ogneun no l tol pèrt demò per el individualmenter, ma per duta sia val. Per ejempie per Fascia tol pèrt socoridores de la trei stazions Auta Fascia, Zenter Fascia e Moena, ma i garejarà duc te n grop con la medema maieta. Defat, enceben che en ultima vegnarà premià ence i trei miores, l Trofeo l é de valèda, no personèl.«

L program del prum Memorial Gino Comelli scomenza en sabeda ai 28 de setember da les 8:15 da doman per dèr fora i numeres de la garejèda; da les 9:15 pearà via la scontrèda tecnica e dapò la desmostrazion de la vies. Da les 9:45 tacarà la vies de califica; domesdì da les 15:30 sarà la finèla e sobito do la premiazions e n moment de compagnia.  

Te chi dis jun Ischia l é ence l festival de parapent Fly Expo e chel de La Bira te Fascia, donca duc chi che rua per tor pèrt o per veder la garejèda de rampinèda di socoridores ladins i arà ence l met de se binèr e de tor pèrt a evenc e entrategnimenc desferenc.

De più su La Usc stampèda de en vender ai 20 de setember.  (LG)