La Usc di Ladins

Festa cun teater, bal y musiga a La Pli de Mareo
En chësta sabeda, ai 6 de messé 2024, dales 20:00 inant, tl zënter d’La Pli. Deplü uniuns garantësc spëisa y boanda
Desco conclujiun dl proiet europeich por le teater amatorial ti mëndri lingac PHŌNĒ vëgnel orga­nisé n festival cun perfor­mances, bal popo­lar cun i »Platleri Salvans« y musiga dal grup musical »Louis & The Space Tra­vellers«. Sce le tëmp ne büta nia alaleria, vëgn le festival metü aa jí te Ciasa dles Uniuns.

Rezitaziun dal »Fanneslied« a Urtijëi
L’auturia Maria Margareth Pedevilla porta dant les perts plü significatives y beles dal epos de Karl Staudacher, tl lingaz original todësch
En gaujiun dla mostra dles artistes dl’EPL–Ert por i La­dins »Äres« tl Circolo / Lia mostra d’Ert a Urtijëi vëgnel invié a na serada leterara desco finissaja dla coletiva en chësta sabeda, ai 6 de messé 2024, dales 20:30, tl medem local dla mostra. L’auturia marora Maria Margareth Pedevilla porta dant les perts plü signi­ficatives dal epos de Karl Stau­dacher, tl lingaz original to­dësch, cun desco cornisc les fotografies de Freddy Sottara & Edith Ellecosta y la musiga de Luisa Miribung.

Autodefenüda personala
La Uniun Sport La Ila mët a jí n curs por jogn y adulc
De messé y agost él la US La Ila che organisëia n curs de autodefenüda personala, cun le maester Luigi Bellotto. Le curs vëgn tigní te palestra dla scora mesana da La Ila; al mët man ai 8 de messé y vá inant por indöt 8 iadi, plü avisa ai 8 y 9, 22 y 23 de messé; 5 y 6, 19 y 20 de agost.
Le grup de jogn y jonins da 12 a 17 agn s’incunta dales 18:30 ales 19:30, le grup di gragn da 18 agn insö dales 19:30 ales 20:30. Le cost é de 90,00€. Iscriziuns ma online sön le sît www.uslaila.it sot la usc »Fitness-corsi«; informaziuns plü menüdes a fitness@uslaila.it

Curs de ilustraziun
L’EPL – Ert por i Ladins inviëia a n curs de ilustraziun cun Giulia Neri
Pro chësc curs imparon da fá n dessëgn por n placat o por le cuertl de n liber. Le curs é ponsé sides por chi che á esperiënza tl setur, che ince por chi che ess ligrëza da porvé fora val’ de nü y á ligrëza da dessigné Le curs vëgn tigní les sabedes ai 13 y ai 20 de messé, dales 16:00 ales 18:30, te scora elementara da La Pli de Mareo. Le cost é de 50,00€ por i mëmbri dl’EPL y 70,00€ por i atri. Por informaziuns y iscriziuns él da contaté Irina Tavella al 339 855 7964, anter i 12 de messé.

Dolodis – L’edema dla geologia
L’ediziun da en chësc ann, dai 9 ai 12 de messé tl’Alta Badia, é dedica­da al elemënt ega; pici y gragn pó imparé val’sura nostes munts y l’ega
Tl’Alta Badia vëgnel tigní dai 9 ai 12 de messé la manifestaziun »Dolodis«, n’edema dedicada ales sciënzes geologiches, olache an pó descu­rí dötes les carateristiches dles Dolomites. L’edi­­ziun de chësc ann é dedicada al elemënt ega. Ai 9 de messé dales 16:30 gnarál inauguré la mostra »Ega«, tl foyer dl salf dles manife­staziuns a Corvara. Tla mostra, che an podará vijité cina ai 9 de agost, pón descurí i socrëc dl’ega. Ara sará daverta dal lönesc ala sabeda dales 8:00 ales 12:00 y dales 15:00 ales 19:00, la domënia dales 9:00 ales 12:00 y dales 16:00 ales 18:00.
Ciantuns didatics y escurjiuns
Ai 9 de messé vëgnel ince tigní n ciantun didatich sön Col Pradat adöm ai colaboradus dl Parch Natural Fanes–Senes–Braies y ai 11.07. sö La Crusc adöm a Rossana Todesco. Intrami é dales 11:00 inant, olache pici y gragn pó imparé val’ deplü sön nostes munts.
Fora por l’edema dla geologia án ince la poscibilité da tó pert a escurjiuns organisades: ai 9.07, do na cörta spazirada da Calfosch cina ales cascades de Pisciadú, pón tó pert a na degustaziun de ega dles Dolomites cun n sommelier; ai 10.07. pón imparé cun Caterina Ghiraldo l’importanza dles spones di rüsc fora por le tru di artisć; ai 11.07. pón jí a vijité l’ander de Conturines y ai 12.07. ván da Fanes ite cun i esperć Francesco Sauro y Rossana Todesco, por imparé sciöche les Dolomites é nasciüdes y sciöche l’ega ti á dé la forma.
Por i mituns dai 5 agn insö vëgnel tigní ai 10.07. n laboratore didatich sura les eghes y les peres dolomitiches, tla biblioteca a La Ila. Ai 11.07. dales 17:00 sarál spo Paul Pizzinini che ti mostrará a düc i partezipanc la zentrala idroeletrica a La Ila.
Tratan l’edema de »Dolodis« gnarál ince pité döes conferënzes: ai 11.07. dales 21:15 él le speleologh Francesco Sauro che cunta a La Ila dl monn y di misters sot tera ite; le de do dales 20:30 él Sandro Gius che cunta tl salf di stödafüch a San Ciascian, sciöche volontars y esperc intervëgn canche al é smöies o rogossies. Te chësta ocajiun podarán ince odëi les mascins y i mesi che an adora te chisc intervënc.
Deplü informaziuns y por prenotaziuns pón jí ti ofizi turistics dl’Alta Badia o sön la plata www.altabadia.org . La manifestaziun »Dolodis« é sot al patrozine dla Sozieté Geo­logica Taliana y vëgn metüda a jí adöm a Rossana Todesco.

»Paisc en festa« a San Ciascian
Cater apuntamënc tratan l’isté, tl zënter de paisc: le pröm ai 10.07.
Ince chësc isté vëgnel indô metü a jí le »Paisc en festa« tl zënter da San Ciascian. La mani­festaziun vëgn organisada cater iadi fora por l’isté. Le pröm apuntamënt é en mercui ai 10 de messé y i atri apuntamënc sará spo ai 24 de messé, ai 7 y ai 21 de agost.
Vigni iade vëgnel tigní dales 16:00 inant n pice marcé de produc dl post y di artejans. Spezialités gastronomiches tradizionales ciafon pro i stonc dles uniuns dl paisc y pro n valgügn eserzizi dl post. I mituns pó se lascé depënje le müs o incunté i »ranger« dl Parch natural Fanes–Senes–Braies. Ai 24 de messé vëgnel metü a jí n domisdé por i mituns adöm al Museum Ladin Ursus ladinicus: dales 15:30 podará i mituns dai 7 ai 12 agn imparé val’ sura les Dolomites y sciöche ares se á formé; dales 17:00 inant pó i mituns dai 4 ai 8 agn vijité le museum y tó pert a n labo­ratore creatif. Por tó pert a chësta ativité mëss i mituns se scrí ite pro le Museum Ladin.
I apuntamënc de »Paisc en festa« gnará animá da deplü grups musicai y en ocajiun dl pröm apuntamënt ai 10.07. podarán aldí dales 16:45 ales 18:45 le duo »Emily & Mattia«, y dales 20:30 inant sona Alexander d’Al Plan.

Mostra »Banda«, de Michel Bernardi
L Circolo de Urtijëi à l plajëi de nvië ala giaurida dla mostra persunela de Michel Bernardi dal titul »Banda«, ai 12 de lugio dala 20:00 tl self dla mostres dla Lia Mostra d’Ert
La mostra prejënta opres de acel, danter chëstes nce lëures fac ti ultimi doi ani, mo mei prejentei al publich. La parola »banda« à doi senificac: per talian fej la parola referimënt a na grupa de persones o cosses, y tl ladin iel la banda, »lamiera«. La mostra tol ite de plu tematiches, coche l cosmos, l raport danter l raziunel y l iraziunel, l spazium y l’ana.
Da chësta mostra uel Bernardi se lascé nmaruië da si lëures y giaurì dialo­ghes y cumbinazions nueves danter si opres.
La mostra resterà da udëi nchin ai 4 de agost, dal merdi nchin la dumënia dala 16:00–19:00 y de sada y dumënia nce dala 10:00 nchin la 12:00.

La Bira Te Fascia
L Festival de la Bira artejanèla da mont sarà jun Ischia a Ciampedel dai 19 ai 21 de messèl
Da 10 egn l Festival de la Bira artejanèla da mont se dèsc ju per valorisèr i picoi produtores che auza fora ence cultura, tradizion e identità. Dai 19 ai 21 de messèl ve speton a Ciampedel te tendon jun Ischia con degustazions, labora­tories per picoi e gregn, musega live e legraza.
Sarà 6 produtores da Trentin, Venet, Pie­mont e Toscana, l concors de la bira preferida e se podarà cercèr la bira spezièla del cedean fata en colaborazion con Rampeèr de Ciam­pedel.
- En vender ai 19 l tendon aur da les 16:00 a les 24:00; da les 21:00 musega live coi Fade.
- En sabeda ai 20 l tendon aur da les 16:00 a les 24:00. Da les 17:00 Malt Attack e do Masterclass; da les 21:00 i Satomi Hot Night.
- En domenia ai 21 l tendon aur da les 12:00 a les 24:00. Da les 15:00 e 17:00 Malt Attack e Masterclass, da les 18:30 pre­­miazion ‘Na Bira per l’Istà’ e da sera la Spritz Band.
La Bira Te Fascia é endrezà da la Sociazion Comunicarea col sostegn de Provinzia de Trent, APT de Fascia, Strada dei Formaggi, Comitat Manifestazions de Ciampedel e Sociazion Unionbirrai.
Info www.labiratefascia.it; wa 329 9159877; prenotazions: labiratefascia@gmail.com

L Mujeo Ladin Fodom tourna a giourì suoi usc
La festa de nnaugurazion l’é perveduda per n juoba ai 11 de lugio 2024, da le siech da sëra, nte la Cesa de la Cultura Fodoma a La Pilé da Fodom
Nte chësta ocajion se podarà vijité l mujeo e la mostra »La memoria de n paesagio« metuda fora demè per chësta sajon.
Ve speton!

Armin Grunt – Dialogh
L Tublà da Nives te Sëlva nvieia ala mostra »Dialogh«, de Armin Grunt. La giaurida ie ncuei vënderdi ai 5 de lugio dala 20:00. Marco Forni fajerà la ntroduzion
L dialogh ie la fundamënta per na cunvivënza. L juda a ntënder y a respeté pruspetives desferëntes, l gëura urizonc nueves y mostra su ponc d’ududa auternatifs. Nscì iel nce tl dialogh danter persona y natura. Canche Armin Grunt tol tla man la sia a motor, ti dà la natura dant la direzion. I muvimënc dl scultëur ti va do cun slune y ntuizion ala vëta dl lën, ti dajan a chësta maniera n’esprescion a cie che l material naturel à da cunté.
La mostra resta davierta nchin ai 28 de lugio, uni di ora che de lunesc dala 16:00–19:00. De merdi, mierculdi y vënderdi nce dala 20:30–22:30.