La Usc di Ladins

Lia di Culeziunisć Gherdëina: di dl barat
N dumënia ai 22 de setëmber, dala 8:00 nchin la 13:00, tën la Lia di Culeziunisć de Gherdëina si di dl barat per duc i nteressei tla Cësa di Cungresc a Urtijëi
L sarà na bela ucajion per duc i culeziunisć, per se ancunté, se giamië ora y sambën per baraté d’uni sort de marches, de vedla chertes, munëides, chertes dal telefon, y n. i.

Culinarium Urtijëi
Na bela esperienza culinaria y gastronomica unirà a s’l dé te de plu restauranc de Urtijëi, dai 22 de setëmber nchin ai 13 de utober
Urtijëi ie cunesciù nce per si gran varietà culinaria. Dai 22 de setëmber inant, nchin ai 13 de utober, piterà i restauranc cëines rafinedes, spëisa tradiziu­nela de Südtirol o ladina, ma sam­bën nce spëisa dla Talia y pizza. N puderà mé crì ora danter la truepa strutures dl Culinarium Urtijëi: Costamula Restaurant, Restaurant Pizzeria Mauriz Keller, Stua Catores, Restaurant Tubladel, Hotel Genziana, Usta­ria Da Checco, Café Restau­rant Val d’Anna, Zicoria Bras­serie, Restaurant Pizzeria Lamm, Re­staurant Mont Sëuc.
No ve perdëde chësta ucajion.

Ancunteda publica sun la segurëza
Nvit a na sëira sun la segurëza, n juebia

• 
•  

View the embedded image gallery online at:
https://www.lausc.it/manifestazions-y-evenc/27931-manifestazions-atuales-speziales#sigProIdbcc8fc7033

ai 26 de setëmber dala 20:30 tla Cësa di Cungresc »Luis Trenker« a Urtijëi
La Assoziazion Nazionela Carabinieres – Sezion de Gherdëina, l Zënter CC de Adestramënt Alpin y l Cumand CC Cumpania de Urtijëi nvieia a chësta ancunteda publica sun la segurëza, cun i referënc Col. Nicola Bianchi - Cum. Zënter Adestramënt Alpin CC de Sëlva, Maior Marco Lanzi - Cum. Cump. CC de Urtijëi y Tenënt-sostiut Luca Desideri - Cum. dl N.O.R..
L rujenerà nce Reinhard Schmalzl - presidënt dla Assoziazion Nazionela Carabinieres de Gherdëina. Mujiga danterite de Margherita Sartor al tlavier.
I zitadins y la zitadines ie nviei de cuer a unì a scuté su y sambën nce a fé du­mandes spezifiches.

Museum Ladin: vijita menada speziala
En domënia ai 22 de setëmber él na vijita menada fora por la mostra »Countdown to Mass Extinction?«, cun le curadú Herwig Prinoth
Le Museum Ladin inviëia a na vijita menada speziala, la domënia, ai 22 de setëmber, fora por la mo­stra »Countdown to Mass Extin­ction?«, cun le curadú Herwig Prinoth. La mostra temporana pîta n cheder afascinant dla maiú estinziun de massa sozedüda tla storia dla tera y la mët en corelaziun cun la crisa climatica atuala.
La vijita menada vëgn pro­ponüda dales 15:00 ales 16:00 por todësch y dales 16:00 ales 17:00 por talian. Al vëgn perié da s’anun­zié a prenotaziuns@musemladin.it o al 0474 524020. Le cost é de 10,00€ (lapró él l’entrada tl mu­seum Ciastel de Tor).

»Fitnesslandia«
La US La Ila mët ince a jí chësc altonn n program rich de ativités
»Fitnesslandia« se tlama le program dla US La Ila, cun cursc desvalies te palestra y tla nodadoia comunala da La Ila. I cursc vëgn tignis danter otober y novëmber, adöm ai istru­turs fitness dla US La Ila. Pité vëgnel acquafitness, nodé por mituns dla scolina y elementara, pilates, meditaziun – mindfulness, cross training HIIT, karate sportif por la elementara, autodefenüda personala por mitans y mituns dla mesana, dles scores altes y adulc, tai chi, nodé y ginastica por por­sones cun dejabilité.
Por informaziuns plü menüdes y iscriziuns él da jí sön www.uslaila.it y por assistënza ales iscriziuns pón scrí a fitness@uslaila.it

Da 10 egn La Bira Te Fascia
L Festival de la Bira artejanèla da mont sarà denef dai 27 ai 29 de setember jun Ischia a Ciampedel
L Festival de la bira artejanèla da mont festeja si prumes 10 egn e per l’ocajion l rua te Fascia con na edizion de setember, tel tendon jun Ischia a Ciampedel, olache dut era peà via.
L festival é endrezà da la sociazion Comunicarea col sostegn de la Provinzia de Trent, l’APT de Fascia, la Strada dei Formaggi de la Dolo­mites, l Comitat Mani­festazions de Ciam­pedel e Union­birrai.
Te chesta edizion 5 laboratories da birèr da Trentin, Sudtirol, Venet e Lom­bardia sporjarà passa 40 sorts de bira des­ferentes e 3 dis sarà cojina ladina con prodoc a km. 0 con La Boteiga de i Saores, Masterclass e musega dal vif. Per la Masterclass ge vel se prenotèr a: labiratefascia@gmail.com
Sarà endò l concors »Na Bira per Setember« per litèr la bira più bona e ti medemi dis jun Ischia sarà ence Fassa Fly Expo de parapent.
Program:
En vender ai 27 e en sabeda ai 28:

• Da les 9:00 aur Fassa Fly Expo col met de proèr materiai e èrc
• Da les 11:00 aur l Festival con bira e ma­gnadiva.
• Da les 16:00 Masterclass con Unionbirrai, degustazion vidèda e abinamenc.
• Da les 21:00 musega live, en vender coi Fade e en sabeda con la Starlight Band.

En domenia ai 29:

• Da les 9:00 aur Fassa Fly Expo col met de proèr materiai e èrc
• Da les 11:00 aur l Festival con bira e ma­gnadiva.
• Da les 15:00 Masterclass con Unionbirrai, degustazion vidèda e abinamenc.
• Da les 17:00 premiazion del concors »Na Bira per Setember«
• Da les 18:00 sera l Festival

Ora de la set mesures
La Lia dl Teater Sëlva nvieia a unì a ti cialé a chësc pez da rì
La cumedia de Ray Cooney ie unida cianceda tl gherdëina da Moritz Demetz, che à sëurantëut nce la regia.
Sun palch saràl da udëi Juri Demetz, Moritz Demetz, Martin Avi, Tobias Nocker, Bruno Ma­ruca, Martin Runggaldier, Sara Perathoner, Ingrid Mussner, Christine Senoner, cun l’assi­stënza de Claudia Senoner, Helga Kerschbamer, Doris Pycha, Laura Senoner, Laura Lussardi, Ivan Senoner, Igor Demetz.
La première ie n sada ai 5 de utober dala 20:30 tla Cësa de Cultura de Sëlva - daldò saràl mo cin’ reprejentazions: merdi ai 8 y vënderdi ai 11 de utober - for dala 20:30, dumënia ai 13 de utober dala 17:00, mierculdì ai 16 y sada ai 19 de utober dala 20:30.
Chertes danora giàpen cherdan su l Mini­shop Sëlva al numer 0471 773133 (mé dan­mesdì).
La Lia dl Teater Sëlva se ncunforta sun vosc unì, ajache l sarà ORA DLA SET MESURES da rì!


Se fidé y crëie

• 
•  

View the embedded image gallery online at:
https://www.lausc.it/manifestazions-y-evenc/27931-manifestazions-atuales-speziales#sigProIdbcc8fc7033

o damí nia?
Savëi che ch’é dal’atra pert dl injin y conësce sües intenziuns, devënta tres deplü na desfida. Le Consëi de Formaziun Badia deboriada al KVW pita na serada d’informaziun por fá löm sön les strategies de trapolaries y movimënc fraudolënc, ponsá fora por ingiané porsones tl tëmp de un n »clic«
Le Consëi de Formaziun Badia deboriada al KVW inviëia ai 24 de setëmber a na serada de informaziun cun les forzes dl ordin dla staziun da La Ila y da Bornech. Le referat cun discusciun sará sön la tematica dla segurëza y di comportamënc da adoté por se stravardé da trapolaries y movimënc fraudolënc. La serada informativa scomenciará dales 20:00 tl local di jogn SaJun a La Ila.


La Crousc Biencia da 50 egn a Cianacei
En sabeda ai 21 e en domenia ai 22 la sociazion de volontariat per socors de la Val de Sora fèsc gran festa per l bel cedean
Al scomenz di egn ’70 l turism tachèa a cre­scer, per jir sa mont d’istà e coi schi d’invern ruèa n muie de jent che podea ence se fèr mèl e aer besegn de n socors asvelt. La soula am­bulanza te val la era a Vich te la sezion de val de la Crousc Checena, che no era desponibola a averjer na sezion a Cianacei. N grop de volontadives se à metù adum per troèr na soluzion e del 1974 i à podù averjer na sezion de la Crousc Biencia e ciapèr na ambulanza da Busan. L scomenz no l é stat sorì: per po­der aer contribuc provinzièi la sezion é passèda sot a Trent e del 1984 la é doventèda autonoma. Del 1988 l’à abù da l’aministrazion la senta te strèda Dantone, del 1996 l’à fat la convenzion con Trentino Emergenza 118 portan sia atività ence a Ciampedel e Mazin e del 2008 l’à podù plindernèr te la neva caserma de protezion zivila de Ciasates.
L é passà encomai 50 egn dai prumes vèresc e per festejèr coche carenea ades la Crousc Biencia de Cianacei endreza na bela festa.
Program:
En sabeda ai 21 de setember:
da les 18:00 aur l tendon al Fassa Park del Ciuch con aperitif e musega del DJ; da les 19:00 aur la cojines per sporjer da cena con hamburger gourmet, pomes fric, würstel e bretzel e da les 21:00 taca a sonèr l grop austriach ‘Schilcherland Buam’
En domenia ai 22 de setember:
da les 10:30 messa te gejia del Sacro Cher, do messa defilèda fin al Fassa Park del Ciuch e aperitif con la ciantarina Elena Favè (debant per duta la jent), la Musega Auta Fascia, i Schuhplattler da Ciampedel e l Grop Folk da Cianacei. Da les 15:00 manovra di volontères de la Crousc Biencia fora dal tendon e tai de la torta che ge vegnarà sporta a duc. La festa fenesc da les 17:00
N cors per aspiranc socoridores
Ence chest an la sociazion endreza l cors de formazion de prum socors, debant e avert a duc chi che à 18 egn compii. L cors endrezà dai istrutores volontères de la Crousc Biencia de Cianacei l pea via ai 24 de setember e l jirà inant con scontrèdes doi outes en setemèna de 2 ores /2 ores e 30’, da les 20:30 a les 22:30/23:00 de mèrtesc e de jebia, con lezions teoriches (en prejenza e/o online) e prateghes con 2 lezions da 4 ores de sabeda domesdì. Dapò sarà l met de fèr ence la formazion de socors sui portoes. Info a: crocebianca@emergenzacanazei.it – https:// emergenza canazei.it o su la piates social de la sociazion.
La ousc di volontères
»Esser te la Crousc Biencia vel dir portèr inant na realtà nasciuda acà 50 egn e fèr pèrt de n grop e de na comunità sèna. Saer co didèr fora na persona tel besegn l é de utol ogne dì, canche se é de servije, ma ence a cèsa o te strèda.«
»Stèr te chesta sociazion vel dir didèr la jent de noscia comunità, più volontères sion e maor l é nosc didament. Fèr ence demò l cors de formazion l é emportant: se ge capitassa zeche a n amich o a n parent, se pel dalbon ge salvèr la vita.