La Usc di Ladins

Bondì Michele. Disto, n curt, chi che t’es?
Mi son l Michele, è 32 agn e vive a Reba; son l fiol del Dario e de la Graziosa e è n fradel.

Ci ne conteto de co t’eve tosat?
I pruns vot agn è vivëst ja Ruac, ulache è podù vive l mond con­tadin: eve gusto a jì a daidé a fè fen! Son jù a scola a Reba: mia clasce l é sté l’ultima che à fat duc cinch i agn a Reba, da l ann davò l é sté porté dut ja La Plié. De chi agn segur me recorde la fegura de la maestra Teresa, na istituzion de la scola de Reba, che la n’à fat fè na mascia de projec liei al ambient e a Fodom.

Ci asto fat de dut nte tua vita?
Davò le mesane è fat la Ragioneria a Belum, percieche bele nlouta eve gusto fè conc: i pruns agn son sté dai prevesc, ma po son sciampé! I ultimi agn i è fac nte na fameia, con autri fodomi, e ilo l é sté chero bel. Davò le scole aute eve bele dezedù da n pez: Ecomonia a Trënt! Ntei agn de l’universcité è trop studié, ma tournáve daspëss a cesa, coscita ciafiáve a daidé mpuò ence mio pere n carozeria... nte chi agn, mosse dì che s’on giaudù!