La Usc di Ladins

A Goms te la Svizra se à dejout la pruma garejèda de Alpen Cup 2020/2021. La competizion de paslonch se à avert tel fin de setemèna passà anter i 4 e i 6 de dezember, ge dajan l met ence a la fascèna Caterina Ganz de se meter en mostra. Te la garejèda sprint l’atleta de Moena la é stat bona de se vadagnèr na bona 4^ posizion, ai piesc del podie formà da la patrona de cèsa Nadine Fähndrich pruma, da la todescia Antonia Fräbel seconda e da la russa Alisa Zhambalova al terzo post.
L quarto post de la fascèna de le Fiamme Gialle te la sprint seniores en tecnica libera l’é stat n gordeon de emozions, con la conquista de la finèla a sie e na batalia che per pech no ge à regalà l prum podie de sajon: »La é jita belebon – ne à dit Caterina Ganz - no son amò deldut en forma, però son contenta percheche è troà endò de bele sensazion che me dasc mingol de fiduzia dò chel che l’é stat l’an passà. L’é stat la pruma gara e è vedù a che pont che son. Ades seghite con i programes de alenament e sarà amò valch test dant de la fin de dezember«.
L prum de chisc l sarà bele prest, ajache chest fin de setemèna, ai 12 e 13 de dezember, Caterina Ganz ge farà front a la proa de Copa Tèlia a Dobbiaco.

De più sui resultac di etres taliegn su La Usc 49 de doman  (Daniele Verra )