La Usc di Ladins

A Moena l é dut n gran rejonèr del projet che cognessa ge dèr neva parbuda no demò al Albergo Corona, ma a dut l Piaz de Sotegrava. L veie frabicat con la veranda che caraterisea l zenter del paisc l é stat comprà l an passà da la FPB Cassa, che la se endreza a ge meter man per fèr fora sia senta neva e »ge dar n contribut a la sistemazion del ‘decoro urbano' e de la viabilità locala«. Coscita se lec te la letra che l president Carlo Vadagnini ge à manà ai sozi de la FPB Cassa (demò a chi de Moena, enceben che l gran investiment l cognessa revardèr duc), per i envièr a na scontrèda resservèda che vegnarà endrezà te Navalge a Moena en mercol ai 30 de otober. Te chela scontrèda, l é scrit su la letra, »vegnarà portà dant a na vida ofizièla la situazion de la projetualità en cors, la soluzions toutes dant e la strèdes che podessa vegnir cernudes, enceben che no sie amò n projet depojità. L enteres e la curiosità sun co che la FPB Cassa volessa mudèr la viabilità e la parbuda del zenter de Moena é segur gran, te curt temp se podarà saer vèlch de più.

 (Lucia Gross)