La Usc di Ladins

Moniaria: angern e anché. Con chest titol, en ocajion de la Festa del Rengraziament metuda a jir chest an da l’Union di Ladins de Fascia adum col Comun General, i doi referenc culturai e aministratives en sabeda ai 26 de otober i à volù ge meter dant a la comunanza l’emportanza de la veiora istituzion fascèna leèda al frabicat storich de Sèn Jan, e l projet de restaure.

A rejonèr de la Moniaria, no demò desche frabicat ma desche istituzion che à abù n peis e n ruol emportant te noscia comunanza, l é stat l professor Cesare Bernard.

L inom Moniaria, che ti documenc troon semper scrit ‘Monegaria’, – à dit Bernard – l vegn da monech: l era apontin l ent che cognea gestir bens e servijes che aea a che fèr con chesta fegura, e l era na istituzion leèda a la veiora Comunità de Fascia. L monech l aea l us de frut de chisc bens, majon, pre e c.i., per l servije che l fajea, no demò per la Gejia ma per duta la comunanza. L é da recordèr prum de dut che la gejies les era de la comunanza, sie mantegniment e sia gestion ge pervegnia apontin a la comunanza e a sia istituzions.
Se la Comunità ge lascèa l us de frut al monech – à dit amò Bernard – l é apontin percheche sie servije l era fondamentèl per la comunanza: el l era l ‘brac operatif’ de la istituzion Moniaria. No demò l cognea ge stèr do a dut che che servia per la gejia e la funzions religiouses, ma l cognea ence sonèr la ciampènes, che segnèa l jir de la vita e de la mort, la ores del lurier, la paussa, la orazions, la festes, e amò l risech de tampesta o de autra situazions de pericol per la comunanza. L monech l cognea ence tegnir netes e engiarèdes la strèdes per poder semper ruèr sorì te gejia, e apede a dut chest – à sotlineà Bernard – l podea vardèr sora a chel che fajea l preve, en particolèr l controlèa che l dijesse la messes che ge era stat dat su.

N restaure respetous

L projetist Marco Giovanazzi, à enveze rejonà di lurieres de restaure. L architet trentin à recordà che chesta Ciasa, ensema con la Calonia e l tobià, anchecondì Istitut Cultural Ladin, l é strutures che fèsc pèrt de na unità leèda a la Pieif e les é stravardèdes da la Sovrintendenza con n medemo vincol.

Te la Moniaria l prum gran lurier l é stat chel de librèr fora dut da n maraut de porcaria che l era stat enmuià te la ultima dejines de egn, che aea fat doventèr l veie frabicat praticamenter na desćèria. I lurieres à dapò metù al luster che ti egn ge é stat metù man più outes a chesta Ciasa e chest à portà ence a problemes statics, per chest l é stat besegn de fèr intervenc de consolidament.

De più sul valor storich de la Ciasa de la Moniaria e sul restaure su La Usc de papier de en vender ai 8 de november del 2024  (Lucia Gross)