La Usc di Ladins

Do esser stat aproà ti Comuns de Cianacei, Ciampedel, Mazin e Soraga, en mèrtesc ai 29 de otober ence l Consei de Comun de Moena, paisc olache l é la senta di Polins de Fascia, à tout dant l Regolament di Polins de Fascia e aproà de mudèr l articol 43 per ge consentir ai Polins de val, che da 10 egn i laora adum con na cordanza de gestion sozièda de val, de vegnir endoté de èrmes. Tel medemo moment l é stat aproà ence l Regolament spezièl che aldò de la normes nazionèles cogn vegnir metù en doura per disciplinèr la sort de èrmes, can e co che les à da vegnir durèdes e olache ge vel les tegnir.

Polins armé: stravardament o pericol?

No duc aboncont i é a una che aer do na èrma smendre l pericol. Desvalives Conseieres de Comun i à uzà fora dubies e cruzies a l’idea che vegne slarià fora la prejenza de èrmes te nesc paijes.

Demò a Mazin chest pont era stat aproà da duc i conseieres, enveze ti etres comuns l aea soscedà dubies e domanes che no semper aea abù respostes chières da man di ombolc e l era stat aproà con stimes de contra o astenjion ence da man de componenc de la maoranza.

A Moena l regolament é stat prejentà dal ombolt Alberto Kostner, che te sia califica de capo del Comun capofila de la gestion sozièda l à n ruol emportant, e l cogn tor dezijions per ejempie sul numer de èrmes che i Polins de Fascia cognarà aer. Kostner l se à palesà con convinzion a favor sul besegn de i endotèr de èrmes, sostegnù dal assessor Felice Canclini, ma l à sotlineà che no se vel oblighèr a votar a una chi che per rejons ideologiches i é contra la èrmes. Gilberto Volcan de la mendranza à dit che no se trata de ideologia, ma del pericol che porta semper la prejenza de èrmes e ensema con l auter component de la mendranza prejent, Andrea Donei, i à votà de contra. Ma cruzies é rué ence da man di conseieres de maoranza Annalisa Zorzi e Luca Follador, per dezijions che podessa uzèr l livel de conflitualità e l portèr fora de control. Per chesta e autra rejons portèdes dant i doi conseieres se à astegnù e l regolament é stat aproà con 8 stimes a favor, 2 de contra e 2 astenjions.

A no aproèr l Regolament l é stat l Comun de Sèn Jan. »Gio é dit sobito che no portaré te mie Consei l regolament per armar i Polins – ne à dit Florian – perché son stat de contra fin dal scomenz. I Polins i vegn touc su dai Comuns per esser al servije di sentadins, i cogn ge star do al trafich, presidiar le scole, vardar che no vegne fat intervenc fora norma, ge responer a chi che domana informazion e c.i., no cogn doventar i ‘sceriffi’ sul teritorie. No me sà giust che i cogne semper de più jir al post de Carabinieres e Polizia, i sarà ence sot organich, ma no l é i Comuns che cogn ressolver chest problem.«

De più su la costion su La Usc stampèda de en vender ai 8 de november del 2024




 (Lucia Gross)