La Usc di Ladins

L é stat prejentà desche n don che Carlo Vadagnini, president de la FPB Cassa e ‘storich' president de la Cassa Rurala de Moena, à volù ge sporjer a sie paisc. L era l 2021 canche Vadagnini à metù sun desch l'idea che la FPB Cassa posse comprar l veie Albergo Corona tel zenter del paisc per far na senta zentrala neva e prestigiousa che reste te Moena. L é stat n empegn lonch e senester, à dit Vadagnini, ma gio e dut l Consei pisson che chesta sie na operazion strategica.

Del projet che la FPB Cassa volessa realisar tel zenter per la neva senta de la banca n vegn rejonà da n trat fora per paisc, ma en mercol ai 30 de otober se à podù per la pruma outa veder valch de ofizial. Chel dì defat i sentadins de Moena che é sozi de chest istitut de credit i é stac envié a na scontrada tel teater de Navalge per poder veder e capir miec la proponeta che la Cassa ge à jà portà dant a la Jonta del Comun ma che, l é stat sotlineà, endana no l é amò n projet ma demò n pre-projet.

A portar dant la idea tecnica l é stat l enjegner Alex Pocher de la Dreika de Busan. Pocher l à deschiarì che le prume endesfide l é stat troar la vida de durar l veie Corona e de l colear con la senta atuala de la Cassa.
La proponeta portada dant da Pocher no revarda demò l veie Albergo Corona, ma la mudassa patoch la parbuda del Piaz de Sotegrava. La senta atuala de la Cassa e l veie Corona i vegnissa batui ju per crear n corp unich, che l restassa mingol più en ite sun Strada Löwy e l permetessa donca de la slariar mingol tel pont più strent, ma da l'autra man la strada Cerilo Dellantonio, che da Troi de Sèn Vile rua ju direta te Piaz de Sotegrava, la vegnissa serada lascian demò n portech larch per passar a pe. A chesta vida - à dit amò Pocher - da l'autra man dedant a la speziaria se creassa n'autra picola piaza.

Intervenc del publich e resposte

N muie de sozi à tout su l envit a chest confront, a desmostrazion che la costion é n muie sentuda, e la proponeta portada dant à abù l aprijiament de la gran part di prejenc, ence con valch batiman. No l é mencià ampò valch obiezion. La più puntuala é stata portada dant da Fabio Chiocchetti del Goti, che l à rejonà de na ocajion perduda da la Cassa per lasciar l segn con n intervent de recuperament storich prestigious ence per l davegnir. L à criticà l'idea de serar la strada che lea l Piaz de Sotegrava con Fachin e la gejia ajache a chesta vida vegn straout l'identità de n post e l à conscidrà n fal ence bater ju la senta atuala de la Cassa, che l é n ejempie enteressant de architetura funzionala. L architet Carlo Ganz à solevà la costion de la viabilità de Moena, che se vegn serà chela strada che ge dasc l met de jir de retorn a chi che se à falà e no i pel ite tel zenter, la fossa amò più embociada.

De più su La Usc stampèda de en vender ai 8 de november del 2024  (Lucia Gross)