La Usc di Ladins

Ai 3 de november del 1918 l é stat sotescrit l armistizie che à metù fin a la Gran Vera. Proprio chesta data é stata cernuda da la Majon di Fascegn per portèr dant a Moena l quarto apuntament del projet »Do l vièl del saer« che chest'outa l ge é stat dedicà a Caterina Pezzé Batesta e Giuseppe Felicetti Zompin. L spetacol de teater, che à contà la storia de chesta doi persones simbol de la Gran Vera te Fascia, l é stat metù dant doi outes, un da la does e un da les cater domesdì.

N spetacol che à soscedà emozions fones e recorc amò vives

Te la spetacolara cort del Batesta a Moena, proprio tedant la cèsa de naa de Catina, olache n'outa l era la pistoria de familia, i atores de la compagnia 'Trei carc de ora' à fat reviver la storia e i sentimenc de Catina e Bepi che con chi de cèsa à vivù en pruma persona i egn dal '14 al '18.

L test del spetacol, scrit con gran umanità e pascion da la regista Ilaria Chiocchetti del Pelin, à fat referiment al liber 'Piccolo diario di Caterina' publicà dal Grop Ladin da Moena del 1995 e a l'intervista video fata al Bepi Zompin da Michele Simonetti Federspiel, Umberto Zanon rechia e Fulvio Demartin, de chesta intervista l é stat ence fat scutèr vèlch toch con la ousc originèla de Giuseppe Felicetti. E dapò se sà ben Alberta e Ilaria les é jites a domanèr fora i parenc per meter ensema recorc e momenc personèi. Catina e Bepi enlouta i era joenec ma i à sentù fon tel cher l peis de chi momenc grieves: Catina, desche duta la femenes che spetèa èrs na letra dai parenc al front; Bepi, che per grazia del enteressament del comandant Richard Löwy l à podù stèr vejin a cèsa ajache l é stat tout coi Stonc sun Boce.
A la fin de la raprejentazion Patrizia Felicetti, neza del Bepi Zompin, à dit che »l é stat na gran emozion viver chi momenc che tante oite se sentia contar e capir che che i à passà« e Renzo Dellantonio del Bandèr, ulim de ot fies de la Catina del Batesta, col ge sporjer l develpai a duc chenc, l à dit con comozion »ne aede empienì l cör«.
N rengraziament spezial l é jit a Alberta Rossi, Ilaria Chiocchetti e Michele Simonetti Federspiel che à emprestà la mondura e l schiop, ai atores David Dorich, Letizia Pezzei, Ivano Favè, Manuela Rasom e Gunther Pezzé, a Luca Follador che à metù la ousc e a duc chi che à didà.

L spetacol vegnarà endò spilenà te teater ai 11 e 12 de jené, canche vegnarà prejentà ence l liber.

De più su La Usc stampèda de en vender ai 8 de november del 2024  (Monica Cigolla)