L Grop da mont de la Val de Sora à endrezà na bela raida dai 12 ai 18 de otober te la provinzia de Salerno.
Do la bona esperienza di egn passé e de chest’aisciuda, i sozi de la sezion Cai Sat Auta Fascia spetèa vèlch bel viac da fèr ensema. Chest'outa l diretif à dezidù de restèr te la Tèlia, ajache ence zenza jir fora de ca se pel troèr posć beliscimes e enteressanc da veder e cognoscer. Aon chierì fora l parch nazionèl del Cilento, Vallo di Diano e Alburni, te la provinzia de Salerno. L parch l é de zirca 180.000 etares a sud de la Campania e l à sia senta a Vallo della Lucania. L confina a nord con la Piana del Sele, a est e a sud con la Basilicata e a ovest col mèr Tirreno e l se slèria fora te 8 comunitèdes da mont e 80 comuns. Dal 1998 l é ence Patrimonie Unesco, apede ai siti archeologics de Paestum, Velia e la Certosa de
Padula. Dal 1997 l é resserva de la biosfera e del 2010 l é doventà l prum geoparch de la Tèlia. L à n profil orografich piutost marcà e salvèrech, con pecia zones dretes e l é bagnà da desvalives ruves riches de èga. L à na geologia interessanta con doi sorts de crepa: l 'flysch' del Cilento, rich de colores e stratificazions, e la crepa calcarea piena de cougoi carsics, da poder vijitèr tant a pe che con azes dal mèr, donca con la bèrca. La piantes de desvaliva sort se desferenziea anter la fascia su la costa con la classica 'macchia mediterranea' fin a zirca 700 metres, e più en aut n bel bosch de quercia spinousa, gregn èlbres de caraboles, olif salvèrech e n muie de pins de Aleppo. Te l'area più en ite l é n muie de bosch da foa, lecci, castagnees, carpin neigher e c.i. L é na gran desvarianza de fiores: ben 254 sorts de orchidees, l picol e bel narcije, tapees de ziclamins de bosch e l rèr 'giglio marino' che cresc sul saolon vejin a l’èga del mèr e dapò n muie de besties de desvaliva sort e ti lesc più auc ence l louf grisc del Apenin.
Ence de gra al bon temp e n tempram douc sui 24 degrees, dai 12 ai 18 de otober aon podù veder dassen n muie de bie lesc.
De più su la raida del Cai Sat Auta Fascia su La Usc stampèda de en vender ai 8 de november del 2024
(Sezion Cai Sat Auta Fascia Cianacei, Ciampedel e Mazin)
