La Usc di Ladins

Per sensibilisèr la jent sun chisc temes e per ge fèr meter vèrda, ti dis passé i Servijes sozio-assistenzièi del Comun General de Fascia i à endrezà emportanc momenc de reflescion, te chi che l é stat dit fora i dac ofizièi e portà dant stories e pensieres en cont del problem del jech.
Per duc i studenc di Licees de la Scola Ladina e per duta la comunanza de Fascia, en vender ai 25 de otober te teater del Oratorie de Poza l é stat metù dant trei repliches del spetacol ‘Gran Casinò', n beliscim toch de teater zivil ideà da la compagnia Itineraria Teatro. I studenc, soraldut chi de la clasc più autes, i à desmostrà gran enteres per na costion che la i tol ite da vejin. Enceben che l jech l sie descomanà a chi che à manco che 18 egn, anter i joegn l problem del jech a scioldi l é semper più slarià fora soraldut perché leà ai pegnes sportives e ai videojeghes, che l é anchecondì la vertoles per se troèr, fèr amicizies, se mateèr, 'se prejentèr a la sozietà', enceben su spazies virtuèi.

L jech l é n fenomen semper pià grief e slarià fora, ence anter i joegn

Te la medema direzion l é jit ence l descors portà dant da la espertes envièdes en lunesc ai 28 de otober te sala grana del Comun General de Fascia a Sèn Jan per la scontrèda dal titol »No se jion la vita«. La dotora Martina Stefani del Ser.D (Servije per la Dependenzes de l’APSS), la dotora Giulia Tomasi, referenta per la sociazion AMA (gropes de autodidament) e la psicologa Martina Volcan de la Coprativa sozièla Le Rais con gran competenza e sensibilità les à rejonà de la situazion del jech a livel local, soraldut vardan de dèr vèlch consei concret per proèr a didèr chi che l é en dificoltà, tel contest de na rei de sostegn.

De più su La Usc stampèda de en vender ai 8 de november del 2024

 (Thomas Zulian)