La Usc di Ladins

La sentada del Consei de Comun chiamada ite en jebia ai 24 de otober l é stat l’ocajion per l’aministrazion de Comun de Soraga de ge sporjer al dotor Guido Dalprà sie fort rengraziament per l servije portà dant desche medico de familia a Soraga.
La jent lo à strent te n fort braciacol con parole de stima. La vize ombolta Sandra Bussolon, a inom de l'aministrazion, la ge à sport na targa de recognoscenza per l prezious lurier fat semper con gran dedizion, profescionalità e umanità.

Sobito do l é stat n auter moment de comunanza. L'aministrazion de Comun à dat fora i stipendium per trei studenc, te chest cajo trei studente, che à portà a compiment si studies con gran merit: Marianna Rossi che à arjont la laurea magistrala a Verona con 110 e la lauda, a tor l premie l era so pare Luigi; Elisa Pellegrin, ence ela con la laurea magistrala a Verona con 110 e la lauda; Vanessa Fontana col diplom de matura a Riva del Garda con 100/100. A dute trei ge é stat fat i complimenc per so percors e n fort batiman.

De più su La Usc stampèda de en vender ai 8 de november del 2024


 (Monica Cigolla)