La U.S. Monti Pallidi à endezà sia radunanza ai 28 de otober e la ge à renovà la fiduzia al Consei. Va inant l bando »scola e sport« col sostegn de la SIF Lujia.
I setores de intervent de l'Union Sportiva Monti Pallidi i cresc amò de più. Tel ge portèr dant sia relazion morala per l ejercizie 2023-24 a la radunanza, chiamèda ite te la scoles de Moena en lunesc ai 28 de otober, l president Carlo Ganz à recordà che la neva normatives met en dificoltà la picola sociazions sportives. Per chierir de ge dèr na man, la sozietà se à tout su da chest an ence la gestion de la neva squadra de volley Monti Pallidi che tolarà pèrt al campionat provinzièl, e di neves corsc de art marziales (Yoseikan budo) che moscia na gran partezipazion. Apede a chest, la sociazion sportiva moenata tol pèrt con empegn a la gestion del Ski & Ice College de la Scola Ladina de Fascia, en particolèr ti setores de la
brea e de la preparazion atletica per l alpin. A chesta vida la Monti Pallidi se met dant semper de più desche referiment te la formazion sportiva no demò a Moena ma ence ti etres paijes de noscia valèdes. »Te chisc egn l empegn a favor de nösc sozi l pol esser calcola te un milion e 500 mile euro - l à dit Ganz, e chisc i va ben segur ence a sostegnir i besognes sozio-economiches de la comunanza.«
La litazions del Consei diretif ge à confermà piena fiduzia al president Carlo Ganz; vizepresident l é Luca Fontanive e conseieres Angelo Burlon, Nadia Chiocchetti, Fabrizio Chiocchetti, Ester Cengia, Livio Deville, Stefano Martinello e Riccardo Vian. La radunanza l é stat ence chest an l'ocajion per premièr i joegn sozi che tel an de scola 2023-24 à arjont i resultac miores tant ti studies che tel sport agonistich de schi alpin, paslonch, brea e combinazion nordica te la categories dai Baby ai Aspiranti, aldò del bando Scola e sport, che chest'outa é stat sostegnù da la SIF Lujia.
De più su La Usc stampèda de en vender ai 8 de november del 2024
(Lucia Gross)
