La Usc di Ladins

For inò nasc n pop massa abenëura, chësc cumporta vel’ deficultà per la mami y per la familia. Per chësta rejon àn bele dan ani metù su na grupa che juda te chësta situazions. Te cunsëi iel nce doi ëiles de Gherdëina, la duturëssa Petra Wanker y l’oma Irene Verra che à abù l’idea de mëter a jì chësta mostra te spedel de Bulsan. Verra à nstës vivù chësta situazion, bën doi iedesc. Un n iede àla butà, un n iede ie l pop nasciù massa abenëura y mort curt do.

Na situazion scialdi ria y da muië, te chëla che l ie mpurtant avëi l sustëni dla familia ma nce de esperc, y nce de na lia che possa judé te chisc mumënc. »I genitores dëssa se damandé aiut, l ie na fasa ria, ntensiva y tol nce a man la fami­lia, plu avisa la copia. N possa nce se damandé aiut psicologich dala grupa che sustën i genitores«, nes à cuntà Irene Verra cunseliera de chësta lia che fova unida metuda su da doi umans bele tl 2010. 

Chëst ann àn pensà de mëter a jì na mostra de fotografies, n’idea de Verra che nes à dit: »Cun chësta fotografies ulëssen ti dé forza y curaje ai genitores. La fotografies nes mostra che la possa nce jì bën, che i mutons possa crëscer su coche duc i autri".

SPM

L articul tla edizion atuela de La Usc di Ladins.