La Usc di Ladins

Le termin di 10 de novëmber é tres plü daimpró: chë domënia olache la comunité da La Val é cherdada da jí a lité danü Ombolt y Consëi de Comun. Por ester che al é na lîta tomperia, gnüda fora de n sarëgn, mësson dí che al é sté bindebó de movimënt de candidates y candidac y sëgn pón dí che an é arjigná. En vëndres dan otedé, ai 25 de otober, él gnü tigní tl salf "Dumëne Moling" na serada por la popolaziun, olache al é gnü presenté la lista cun sü candidac, sciöche ince i punc prinzipai dl program che an se tol dant.

Sciöche l’ultim iade, él gnü metü sö na lista sora, la lista "La Val", sön chëra che al se mët a desposiziun 23 porsones. Dui é i candidac a ombolt: l’assessur y ombolt di ultims mëisc Felix Dapoz da Ciablun y l’assessur Felix Nagler. Cun intrami ciafëise na intervista chiló dlungia. Por le Consëi s’á lapró metü a desposiziun 13 ëi y 8 ëres. I publicun sü inoms do la suzesciun che ai é sön le jorantin de informaziun: Magdalena Miribung, Johann (Hansi) Rubatscher, Veronica Rubatscher, Matteo Pescollderungg, Vito Campei, Daniele Moling (Cestun), Markus Complojer, Carlo Nagler, Alexander Alton (Alex), Davide Frenes, Daniel Frenes, Manfred Moling, Valentin Miribung (Tino), Alex Ploner, Elisabeth Insam, Michaela Sorarú (Micky), Maria Valentin (Arciara), Raimund Campei, Manuela Clement Frenes, Helene Pescoll Dejaco y Kathrin Lindner.

T’La Usc di Ladins dl 31 de otober ciafëise deplü, ince na intervista cun intrami i candidac a ombolt.  (pablo)