La Usc di Ladins

Al n’é nia le pröm iade che i scriun dla burcia al’entrada d’Al Plan. Na burcia olache al röia la strada provinziala da Longega sö, olache al vá inant la strada provinziala cuntra La Pli, olache al vá inant la strada comunala cuntra le zënter. Lapró él na bela cumpëda de azesc a ciases privates. N viavai de auti nia ma de sajun, na visibilité limitada, toc zënza marciapîsc y porchël n prigo cis por chi che vá a pe y mëss passé ia la strada.
Na porsona che conësc la chestiun y se l’á tuta a cör é Johanna Clara, uma de familia che fej le tru de por de. Ëra á tres indô segnalé la chestiun de chësta burcia: n iade ânse scrit t’La Usc dl 2022 y n iade chësc ann de merz, olache al parô che al gniss a s’al dé n valgügn adatamënc ciamó chësc ann, mo sozedü n’él ciamó nia. Sëgn vá la chestiun tl proscim capitul: bele da d’aisciöda â Clara contaté la emitënta radiofonica Südtirol 1, che á la rubrica "Gesagt Getan – gemeinsam für mehr Sicherheit am Schulweg", por plü sigurté sön le tru da jí a scora. La sostanza de chësta rubrica, en colaboraziun cun la Provinzia de Balsan, le Safety Park y le VKE, é chëra da jí söl post a se fá n cheder dla situaziun y porvé da rové a na soluziun. Do mëisc che la uma n’á ciafé degöna resposta, ésera gnüda a s’al dé.

Deplü podëise lí t’La Usc di Ladins di 8 de novëmber  (pablo)