La Usc di Ladins

En sabeda sëra, ai 2 de novëmber, s’ál desfiré sön palch dla Ciasa dla Cultura a La Ila la premiera dl ultim toch teatral dl’Uniun Teater La Ila. Abelí dala scenografia de Ursula Tavella, é le toch gnü lauré fora deboriada tl grup de teater y dedô metü jö sön papier dala man dla regista Erika Castlunger. Chësc cunta na storia che n’é por la jënt dl post gnanca tan foresta.

Sön le Lüch »Col Plat« él so y fre Olga y Scebio che stá cun fistide. Le lüch arpé y oramai atempé, é plëgn de debic. Por mantigní inant le lüch laora i dui patruns dassënn, mo ince cun l’aiüt dl fant Giuvani, stëntera da jí inant. Al é da ciafé na soluziun y chël le plü adora che ara vá. Porchël se mët i patruns debota al laur. N bun retlam cun les dërtes parores fej fora dl Lüch »Col Plat« n agriturism idilich y unich. Ci che vëgn impormetü sön la plata internet dl lüch é n’esperiënza unica, che ti mudará la vita a chi che passará n’edema a contat strënt cun la natöra. Implü vëgn sanité y relax scric gragn, en gran lëtres sciöche la scrita »BIO«, dlungia la descriziun di produc locai y sagns, che rovará sön mësa.
»MONEY MONEY MONEY!!«, anunziëia le fant Giuvani, entusiast de süa idea.


Deplü ciafëise da lí tla ediziun nöia de vëndres, ai 8 de novëmber!